Afg‘oniston yana vertolyotlarni qaytarishga chaqirdi

Afg‘oniston Islom Amirligi Tashqi ishlar vazirligida diplomatlar va xalqaro tashkilotlar vakillari ishtirokida bo‘lib o‘tgan yig‘ilishda bank sanksiyalarini bekor qilish va mamlakat sharqida zilziladan jabrlanganlarga yordam ko‘rsatish masalalari muhokama qilindi, deb xabar bermoqda OAV.

Tolibon TIV rahbari Amir Xon Muttaqiy yana bir bor O‘zbekiston va Tojikistonni Kobul qulaganidan keyin afg‘on harbiylari mamlakatdan qochib ketgan harbiy aviatexnikalarni, bu safar zilzila fonida gumanitar maqsadlarda foydalanish uchun vertolyotlarga muhtojlik bahonasida qaytarishga chaqirdi.

Biz to‘rt yil avval, siyosiy voqealardan so‘ng, vertolyotlarimizning bir qismini olib qo‘ygan va qo‘shni davlatlarga olib ketgan davlatlarni ushbu vertolyotlarni Afg‘oniston xalqiga qaytarishga chaqiramiz, shunda ulardan gumanitar operatsiyalarda foydalanish mumkin bo‘ladi, — dedi Muttaqiy.

Shuningdek, u sanksiyalar xorijdagi afg‘onlarga moliyaviy yordam yuborishni murakkablashtirayotganini ta’kidlab, jahon hamjamiyatini cheklovlarni bekor qilishga chaqirdi:

Afsuski, Afg‘onistonga nisbatan qo‘yilgan adolatsiz va noqonuniy cheklovlar tufayli yurtdoshlarimiz zilziladan jabr ko‘rganlarga yordam yubora olmayapti, — dedi u.

BMT bosh kotibining Afg‘oniston bo‘yicha maxsus vakili Roza Otunbayeva zilziladan keyingi qutqaruv operatsiyalarida tibbiyot xodimlarining yetishmasligidan xavotir bildirdi. Muttaqiyning qo‘shimcha qilishicha, jabrlanganlarga uzoq muddatli yordam ko‘rsatish hukumat uchun ustuvor vazifa bo‘lib qolmoqda.

Eslatib o‘tamiz, kuni kecha O‘zbekiston Tashqi ishlar vazirligi harbiy texnikalarni qaytarish niyati borligi haqidagi xabarlarni rad etdi.

Bunday xabarlar haqiqatga to‘g‘ri kelmaydi. O‘zbekistonning pozitsiyasi o‘zgarishsiz qolmoqda, tarqalayotgan yangiliklar esa feykdir, — deya ta’kidladi TIV matbuot kotibi Ahror Burxonov.

Avvalroq toliblar O‘zbekistondan vertolyotlarni qaytarishni bir necha bor so‘ragandi. Ayrim tahlilchilarning fikricha, toliblar hukumati xalqaro hamjamiyat tomonidan tan olinmaguncha vertolyotlarni qo‘lga kiritishning iloji bo‘lmaydi.

Vertolyotlarga kelsak, bu vertolyotlarning hujjatlari Afg‘onistonga aloqadorligiga ishonchim komil emas. Ikkinchi muammo — hech bir davlat tomonidan tan olinmagan Tolibon hukumati muammosi, — dedi sobiq afg‘on diplomati Fahim Kohdamoniy.

2022-yil yanvar oyida Pentagon vakili Jon Kirbi 2021-yil avgust oyida afg‘on harbiylari tomonidan O‘zbekiston va Tojikistonga olib ketilgan samolyotlar Afg‘onistonga qaytarilmasligini aytgan edi.

Eslatib o‘tamiz, avvalroq “Tolibon” O‘zbekistondan afg‘on vertolyotlarini qaytarishni talab qilgandi. Mudofaa vazirining qayd etishicha, aks holda O‘zbekiston salbiy oqibatlarga duch keladi.

2021-yil 16-avgust kuni Bosh prokuratura Afg‘onistonning 585 nafar qurollangan harbiy xizmatchisi bo‘lgan 22 ta harbiy samolyot va 24 ta vertolyot O‘zbekistonga noqonuniy uchib kelganini ma’lum qildi.

Avvalroq Afg‘onistondan O‘zbekistonga kelgan vertolyotlarning bir qismi AQShga qaytarilgani haqida xabar berilgandi. Shu bilan birga, Amerika aviatexnikalarining katta qismi hali ham respublikada qolmoqda.