Toshkentda muddati o‘tgan katta miqdordagi spirtli ichimliklar savdosiga chek qo‘yildi

Firibgarlar maxsus suyuqlik yordamida tovarlar qadog‘idagi yaroqlilik muddatini o‘zgartirib, ularni sotishgan.

Toshkentda huquq-tartibot idoralari xodimlari ko‘p miqdordagi muddati o‘tgan mahsulotlar savdosiga chek qo‘yildi. Bu haqda DXX matbuot xizmati ma’lum qildi.

Hodisa Yashnobod tumanida yuz bergan. Spirtli va alkogolsiz ichimliklar savdosi bilan shug‘ullanuvchi ikkita xususiy korxona omboridan muddati o‘tgan tovarlarning katta partiyasi aniqlandi. Ularning 429 million 629 ming so‘mlik 79 172 donasi ichimliklar va 134 million 845 ming so‘mlik 3374 donasi alkogol mahsulotlari edi.

Bundan tashqari, omborxonada 1 milliard 187 million so‘mlik 25 746 dona import va mahalliy spirtli ichimliklar chek va hujjatlarsiz saqlanayotgani ma’lum bo‘ldi. Aniqlanishicha, ko‘plab salqin ichimliklarning yaroqlilik muddati maxsus suyuqlik yordamida o‘zgartirilib, sotuvga tayyorlangan ekan.

“Yaroqlilik muddati o‘tgan va kirim hujjatlariga ega bo‘lmagan ichimliklar sifatini tekshirish yuzasidan ekspertiza tayinlandi”, — deyiladi xabarda.

Eslatib o‘tamiz, avvalroq MIB xodimlari minglab yaroqsiz spirtli ichimliklarni yo‘q qilgan edi. Mahsulotlar jinoyat ishlari bo‘yicha ashyoviy dalil sifatida departamentning tuman bo‘limida saqlangan.

NOVA24 YouTubeʼda. Obuna boʻling
Asosiy yangiliklar va qiziqarli videolar