DXX uch viloyatda noqonuniy yer sotish holatlariga chek qo‘ydi

Hozirda barcha holatlar yuzasidan mazkur shaxslarga nisbatan jinoyat ishlari qo‘zg‘atilib, tergov harakatlari olib borilmoqda.

DXX Toshkent, Surxondaryo va Xorazm viloyatlarida yer maydonlarini noqonuniy sotish holatlariga chek qo‘ydi.

Toshkent viloyatining Olmaliq shahrida yashovchi fuqaro Ohangaron tumanida joylashgan va qishloq xo‘jaligiga mo‘ljallangan 32 gektar yerni mansabdor tanishlari orqali xaridor nomiga rasmiylashtirib berish evaziga 2 million 400 ming AQSh dollari talab qilib, oldindan 500 ming AQSh dollarini Toshkent shahridagi kafelardan birida olgan vaqtida Davlat xavfsizlik xizmatining Toshkent shahar bo‘yicha boshqarmasi, shahar Ichki ishlar bosh boshqarmasi hamda Iqtisodiy jinoyatlarga qarshi kurashish departamentining shahar boshqarmasi xodimlari tomonidan ashyoviy dalillar bilan ushlangan.

Yana bir tezkor tadbirda Yangiyo‘l tumanida yashovchi, 1974 va 1978-yillarda tug‘ilgan ikki kishi o‘zaro til biriktirib, tuman hokimligi zaxirasida bo‘lgan 48 sotix yerni mansabdor tanishlari orqali xaridor nomiga rasmiylashtirib berish evaziga 60 ming AQSh dollari hamda kadastr hujjatlarini hal qilib berish evaziga 8160 AQSh dollari talab qilishib, shundan 64 ming AQSh dollari olgan vaqtlarida ushlandi.

Surxondaryo viloyatining Sherobod tumanida yashovchi, 1990-yilda tug‘ilgan shaxs Suv xo‘jaligi vazirligining “Amu-Surxon” Irrigatsiya tizimlari havza boshqarmasiga qarashli Sherobod tumanidagi Meliorativ ekspeditsiya balansida bo‘lgan 20 sotix yer maydonini hamda 1961-yilda tug‘ilgan mahalliy fuqaroga tegishli, qishloq xo‘jaligiga mo‘ljallangan 45 sotix yer maydonini jami 60 ming AQSh dollariga sotishga kelishib, 56,7 ming AQSh dollari va 43 million so‘m olgan vaqtida DXX, IIV hamda IJQKD xodimlari tomonidan ushlangan.

Xorazm viloyatining Urganch tumanida yashovchi 1979-yilda tug‘ilgan shaxs mazkur tumandan oqib o‘tuvchi Shovot kanali bo‘yida joylashgan va davlat zaxirasida bo‘lgan 24 sotix yer maydonini kadastr tizimida ishlovchi tanishlari orqali xaridor nomiga rasmiylashtirib berish evaziga 45 ming AQSH dollari va 13 million so‘m olgan vaqtida ushlangan.

NOVA24 TikTokʼda. Obuna boʻling
Asosiy yangiliklar va qiziqarli videolar