Nodirbek Abdusattorov nufuzli turnir sovrindori bo‘ldi

O‘zbekistonlik shaxmatchi Tata Steel Chess 2025 musobaqasini 3-o‘rinda yakunladi.

Niderlandiyaning Veyk-an-Zee shahri mezbonlik qilgan shaxmat bo‘yicha an’anaviy Tata Steel Chess—2025 musobaqasi kecha, 2-fevral kuni yakuniga yetdi.

13-turda Masters guruhida Nodirbek Abdusattorov oq donalarda hindistonlik Pentala Harikrishnaga qarshi bahs olib bordi. O‘zbekistonlik shaxmatchi Hindiston vakili bilan durang o‘ynadi va turnirni 8 ochko to‘pladi. Shunday qilib, Abdusattorov musobaqani 3-o‘rinda yakunladi.

19 yoshli hindistonlik shaxmatchi Rameshbabu Pragnanandha Tata Steel Chess Masters 2025 chempioni bo‘ldi. U tay-breykda amaldagi jahon chempioni, 18 yoshli vatandoshi Gukesh Dommarajuni 2:1 hisobida mag‘lub etdi.

Challenger guruhida qatnashgan Nodirbek Yakubboyev ketma-ket uchta g‘alabaga qaramay uchlikdan joy ololmadi. So‘nggi turda Nodirbek Yakubboyev Lu Miaoyi ustidan g‘alabaga erishdi va xuddi Abdusattorovdek 8 ochko to‘pladi.

Challengers turnirida Van Nguyen g‘olib chiqdi. U 12 ta partiyada 9,5 ochko to‘pladi. Bu ajoyib natija unga kelgusi yilgi Masters musobaqasida ishtirok etish imkoniyatini taqdim etdi.

NOVA24 Instagramʼda. Obuna boʻling
Asosiy yangiliklar va qiziqarli videolar