Toshkentda fuqaro hojatxona uchun qazilgan chuqurlikka tushib ketdi

Yashnobod tumanida 10 metr chuqurlikka tushib ketgan fuqaroni qutqardi. U yengil tan jarohati olgan, hozirda shifokorlar nazorati ostida.

Toshkent shahri Yashnobod tumanida 5-yanvar kuni fuqaro 10 metrlik chuqurlikka tushib ketdi. Bu haqda FVV axborot xizmati xabar berdi.

Ma’lum qilinishicha, yakshanba kuni soat 13:58 da tumanning Boyqo‘rg‘on mahallasida fuqaro ehtiyotsizlik sabab hojatxona uchun qazilgan 10 metrlik chuqurlikka tushib ketgani haqida FVBga xabar kelib tushgan.

Qutqaruvchilar zudlik bilan aytilgan manzilga yetib borib, qutqaruv anjomlari yordamida fuqaroni chuqurlikdan chiqarib olgan va birinchi yordam ko‘rsatgan.

Shundan so‘ng fuqaroga tibbiy yordam ko‘rsatish uchun tez tibbiy yordam xodimlariga topshirilgan. Fuqaro yengil tan jarohati olgan bo‘lib, hozirda shifokorlar nazorati ostida. Uning ahvoli yaxshi, deyiladi xabarda.

NOVA24 YouTubeʼda. Obuna boʻling
Asosiy yangiliklar va qiziqarli videolar