Samarqand viloyatining Samarqand tumanida joylashgan savdo doʻkonlaridan birida katta yongʻin sodir boʻldi. Bu haqda viloyat Favqulodda vaziyatlar boshqarmasi axborot xizmati xabar berdi.

Qayd etilishicha, yongʻin bugun, 29-oktyabr kuni Samarqand tumani Xoʻja Ahror Valiy mahallasining Gʻalaba koʻchasida joylashgan savdo doʻkonlaridan birida sodir boʻlgan.

Hodisa haqida soat 09:04 da viloyat FVBga xabar berilgan. Shunga koʻra, 3 ta yongʻin-qutqaruv ekipaji jalb qilinib, voqea joyiga soat 09:11 da yetib borib, soat 09:40 da yongʻin toʻliq bartaraf etilgan.

Yongʻin oqibatida savdo doʻkonining shift, tom qismi va kiyim-kechak mahsulotlari yonib zararlangan. Hodisada jabrlangan va halok boʻlganlar yoʻq. Hozirda tergovga qadar tekshiruv harakatlari olib borilmoqda.