Шавкат Мирзиёев Владимир Путин билан телефон орқали мулоқот қилди

Ўзбекистон президенти Москва вилоятидаги теракт муносабати билан россиялик ҳамкасби ва Россия халқига ҳамдардлик билдирди. Айни пайтда қурбонлар сони 115 нафарга етган. Ўзбекистоннинг Москвадаги элчихонаси ходимлари шифохоналарга борган ҳолда юздан ортиқ жароҳатланганлар орасида Ўзбекисон фуқаролари йўқлигига аниқлик киритмоқда.

Ўзбекистон Республикаси президенти Шавкат Мирзиёев 23 март куни Россия Федерацияси президенти Владимир Путин билан телефон орқали мулоқотда унга ва дўст Россия халқига Москва вилоятидаги «Крокус Сити Холл» концерт залида содир этилган террорчилик ҳаракати оқибатида кўплаб инсонлар қурбон бўлгани муносабати билан чуқур ҳамдардлик билдирди.

«Давлатимиз раҳбари Ўзбекистоннинг кўп миллатли халқи номидан вафот этганларнинг оила аъзоларига бардамлик, жароҳатланганларга тез фурсатда шифо топишларини тилади. Бегуноҳ инсонларга қарши каратилган ушбу жиноят яна бир бор қатъий қораланди.

Россия етакчиси, ўз навбатида, Ўзбекистон президентига ушбу оғир дамда билдирилган далда сўзлари ва зарур кўмакни кўрсатишга тайёрлиги учун миннатдорлик билдирди. Мамлакатларимиз хавфсизлиги ва барқарор тараққиётига таҳдид бўлган ушбу ёвуз кучга курашиш бўйича икки томонлама ҳамкорликни фаоллаштиришга келишиб олинди», — дейилади Ўзбекистон президенти матбуот хизмати хабарида.

Сўнгги маълумотларга кўра, Москвадаги «Крокус сити ҳолл» мажмуасида рўй берган теракт қурбонлари сони 115 нафарга етган. Россия Тергов қўмитаси маълумотига кўра, портлаш ва ёнғин рўй берган мажмуада иш олиб бораётган қутқарувчилар вайроналар остида янги жасадларга дуч келган. Москва области губернатори Андрей Воробев қурбонлар сони яна ошиши мумкинлигини маълум қилди. Айни пайтда 20 дан ортиқ шифохонада 100 дан зиёд жароҳатланган одамларга тиббий ёрдам кўрсатилмоқда.