Toshkentda qizcha harakatlanayotgan avtomobildan yo‘lga tushib ketdi
Jabrlanuvchining bobosi bolaning salondan yo‘qolganini darhol payqamagan.
Toshkentda 4 yoshli qizcha harakatlanayotgan mashina salonidan yo‘lning qatnov qismiga tushib ketgan, shundan so‘ng transport vositasi harakatni davom ettirgan, deb xabar bermoqda YHXBB matbuot xizmati.
Ma’lumotlarga ko‘ra, voqea 9 oktyabr kuni Sergeli tumanida sodir bo‘lgan. 61 yoshli erkak “VAZ-2115” avtomobilida nabirasini bog‘chaga olib ketayotganida, qizaloq tasodifan derazani yopish o‘rniga eshikni ochib yuborgan. Ijtimoiy tarmoqlarda tarqalgan videolavhada shundan so‘ng transport vositalari harakatni davom ettirgani, bola esa tezda yo‘l chetiga chiqib ketgani aks etgan.
Qayd etilishicha, bolaning bobosiga voqea haqida yo‘lovchilar xabar bergan. Guvohlardan biri qizchani ko‘tarib, xavfsiz joyga olib borgan. Bobosi chaqaloq jabrlanmagani va hozirda uning sog‘lig‘iga hech qanday xavf yo‘qligini ma’lum qildi. Qayd etilishicha, holat yuzasidan surishtiruv ishlari olib borilmoqda va fuqarolarga yo‘llarda xavfsizlikni ta’minlash, shuningdek, kichik yoshdagi yo‘lovchilarni tashishda bolalar o‘rindiqlaridan foydalanish zarurligi eslatib o‘tilgan.
Avvalroq Namanganda maktab o‘quvchisi paxta ortilgan tirkamadan tushib ketib, g‘ildiraklar ostida qolgani haqida xabar berilgandi. O‘smir olgan tan jarohatlari oqibatida vafot etgan.
Izohlar