Toshkentda drift boʻyicha Oʻzbekiston chempionati oʻtkaziladi

Musobaqada istalgan kishi ishtirok etishi mumkin.

21-23-mart kunlari Toshkentda drift boʻyicha Oʻzbekiston ochiq chempionati oʻtkazilishi haqida poytaxt hokimligi matbuot xizmati xabar berdi.

Maʼlumotlarga koʻra, tadbir Oloy bozori yaqinidagi avtoturargohda boʻlib oʻtadi. Ikki kunlik dastur davomida tomoshabinlar professional haydovchilarning mahorati va unutilmas adrenalinli muhitdan toʻliq bahramand boʻlish imkoniyatiga ega boʻladilar.

Xususan, 21-22-mart (juma-shanba) kunlari quyidagilar amalga oshiriladi:

• ishtirokchilarni roʻyxatga olish;
• sportchilar uchun yoʻriqnoma;
• texnik va tibbiy koʻrik;
• malaka sinovlari;
• mashgʻulot sessiyalari.

23-mart (yakshanba) kuni ishtirokchilar va tomoshabinlarni kutayotgan tadbirlar:

• chempionatning asosiy musobaqalari;
• mamlakatning eng yaxshi drifterlarining yorqin chiqishlari;
• gʻoliblarni tantanali taqdirlash marosimi.

Tadbirga kirish bepul. Hokimlik poytaxt aholisi va mehmonlarini sportchilarning tomoshabop mahoratidan bahramand boʻlishga taklif etdi.

NOVA24 YouTubeʼda. Obuna boʻling
Asosiy yangiliklar va qiziqarli videolar