Husanov faoliyatini APL grandi safida davom ettirishi mumkin

Abduqodir Husanovga qiziqish bildirayotgan APL grandlari soni yana bittaga ortdi.

Fransiyaning “Lans” klubi va O‘zbekiston milliy terma jamoasi markaziy himoyachisi, 20 yoshli Abduqodir Husanovni o‘z safiga qo‘shib olishni xohlayotgan APL klublari safi yana bittaga ko‘paydi.

Hozirda ishi yurishmayotgan va ketma ket mag‘lubiyatga uchrayotgan Gvardiola boshqaruvidagi “Manchester Siti” O‘zbekistonning eng qimmat o‘yinchisi transferiga qiziqish bildirmoqda.

Parij nashri L’Equipe xabariga ko‘ra, “Lans” Husanovni yanvar oyidagi transfer oynasida sotishga tayyor. Faqat 30 million yevrodan kam bo‘lmagan takliflarni ko‘rib chiqadi. Joriy mavsumda Husanov barcha musobaqalarda 15 ta o‘yin o‘tkazdi. Uning “Lans” bilan tuzgan shartnomasi 2027-yilning yoziga qadar amal qiladi.

APLning “Tottenhem”, “Nyukasl”, “Chelsi”, “Vest Hem” va “Lester” klublari futbolchiga qiziqish bildirayotgani haqida xabar berilgandi.

Bundan tashqari, “PSJ” va Madridning “Atletiko” klublari ham himoyachi xizmatlaridan foydalanish niyatida.

Transfermarkt portali futbolchining transfer bahosini 12 million yevroga baholagan.

NOVA24 YouTubeʼda. Obuna boʻling
Asosiy yangiliklar va qiziqarli videolar