Ulug‘bek Rashitov antidoping qoidalarini buzgani uchun diskvalifikatsiya qilinganiga izoh berdi

Taekvondo bo‘yicha ikki karra Olimpiada chempioni Ulug‘bek Rashitov diskvalifikatsiyasiga izoh berdi.

Sportchining ta’kidlashicha, u qandaydir taqiqlangan dori vositasida qo‘lga tushgani uchun emas, balki joylashuvi bo‘yicha qoidabuzarliklarga ega bo‘lgani uchun diskvalifikatsiya qilingan. Taekvondochi har bir sportchi har kuni dasturni to‘ldirishi, qayerda yashashi, qayerga uchib ketishi va qayerda tunashini ko‘rsatishi kerakligini ta’kidladi.

“Mening oldimga ertalab soat oltida kelishdi, bu noyabr oyi edi. Garchi mening dasturimda kechki soat to‘qqiz bo‘lsa-da, ya’ni ertalab soat oltida kimdir oldimga kelishini sira kutmagan edim. Menga hatto qo‘ng‘iroq ham qilishmadi, faqat SMS yuborishdi, shundan so‘ng hech qanday bayroqcha bo‘lmasligini aytishdi. To‘rt oy o‘tgach, xat yuborishadi va bu holat qoidabuzarlik sifatida baholanishi va biz seni diskvalifikatsiya qilish to‘g‘risida qaror qabul qilishimiz haqida ishontirishadi”, — deya qo‘shimcha qildi u.

Ulug‘bek Rashitov sodir bo‘lgan voqeadan hayratda qolganini aytdi.

“Men shok holatida edim. Oxirgi marta 22-aprel kuni oldimga kelib, doping-namuna olishgandi. Ular mening pok ekanimga ishonch hosil qilishdi va mana bunday qarorga kelishdi. Ammo endi hammasi ortda qoldi, bo‘lib o‘tgan voqealarni qaytarib bo‘lmaydi”.

U 2028-yilda Los-Anjelesda bo‘lib o‘tadigan Olimpiya o‘yinlarida ishtirok etish istagi va motivatsiyasi borligini ta’kidladi.

“Men tayyorgarlik ko‘raman va qo‘limdan kelgan va kelmagan barcha ishni qilaman”, — deya xulosa qildi Rashitov, qo‘llab-quvvatlash va tushunish uchun minnatdorchilik bildirib.

Eslatib o‘tamiz, Ulug‘bek Rashitov dunyoning eng yaxshi taekvondochisi deb topilgandi. Ikki karra Olimpiada chempioniga Gonkongda sovrin topshirildi. Ulug‘bek Rashitov 2021 va 2024-yilgi Olimpiya o‘yinlarida oltin medalni qo‘lga kiritgan. Rashitovning birinchi oltin medali O‘zbekiston tarixidagi birinchi oltin medal bo‘ldi.