Rossiyalik kurashchi Alik Xadarsevga sport fuqaroligini O‘zbekistonga o‘zgartirish rad etildi
Rad etishning sababi federatsiyalar uchun fuqarolikni o‘zgartirish kvotalarining cheklangani edi.
Rossiyalik erkin kurashchi Alik Xadarsevga sport fuqaroligini O‘zbekistonga o‘zgartirish rad etildi, deb xabar bermoqda RIA Novosti Sport arbitraj sudi rasmiy saytiga tayanib.
Ma’lumotlarga ko‘ra, idora Birlashgan kurash dunyosining Alik Xadarsevga sport fuqaroligini O‘zbekistonga o‘zgartirishni rad etish to‘g‘risidagi qarorini o‘z kuchida qoldirgan. Qayd etilishicha, sportchi 2025-yilning 18-yanvarida O‘zbekiston fuqaroligini olgan va shu kunning o‘zida O‘zbekiston kurash assotsiatsiyasi kurashchiga sport fuqaroligini almashtirish bo‘yicha so‘rov yuborgan.
Biroq 31-yanvar kuni tashkilot har qanday federatsiya yiliga barcha uslublar va yosh toifalarini hisobga olgan holda uch nafardan ortiq bo‘lmagan erkak va ayollarga fuqarolikni o‘zgartirishga ruxsat berishi mumkinligi to‘g‘risidagi qoidaga asoslanib, arizani rad etdi. Ma’lum bo‘lishicha, Rossiya sport kurashlari federatsiyasi 2025-yil uchun kvotani allaqachon tugatgan.
O‘z navbatida, sportchi bunday qarorga rozi bo‘lmagan va apellyatsiya yuborgan, unda u uch yil davomida Rossiya terma jamoasi safida xalqaro musobaqalarda ishtirok etmaganini, shuning uchun ushbu qoidani hisobga olmagan holda fuqaroligini o‘zgartirish huquqiga ega ekanligini ta’kidlagan. Sudda kvotalar to‘g‘risidagi qoida tanaffusdan qat’i nazar qo‘llanilishi va yakkabosh hakam tomonlarning dalillarini ko‘rib chiqib, shunga qaramay, kurashchining foydasiga qaror qabul qilmaganligi ta’kidlandi.
Avvalroq O‘zbekiston erkin kurashchilari yoshlar o‘rtasidagi Osiyo chempionatini uchinchi o‘rinda yakunlagani haqida xabar berilgandi. Sportchilar bitta oltin, uchta kumush va beshta bronza medalini qo‘lga kiritdi.
Izohlar