O‘zbekistonliklar telefon orqali oltin quymalarini sotishi mumkin bo‘ladi
Qimmatbaho metallarni sotib olish va qayta sotish elektron shaklga o‘tkaziladi.
O‘zbekistonda fuqarolarga oltin quymalarni mobil ilovalar orqali sotish va sotib olishga ruxsat berildi, deb xabar bermoqda Adliya vazirligi matbuot xizmati.
Vazirlik ma’lumotlariga ko‘ra, yangi nizom banklar, shu jumladan mikromoliyaviy banklar tomonidan qimmatbaho metallar bilan operatsiyalarni amalga oshirish tartibini belgilab berdi. Xususan:
- bankning mobil ilovasi orqali mijozlar tomonidan o‘lchovli oltin quymalarni sotib olish va qayta sotish;
- o‘lchovli oltin quymalarni sotish va ularni Markaziy bankdan sotib olish yo‘li bilan banklar tomonidan qaytarib sotib olish;
- banklar tomonidan qimmatbaho metallarni elektron (jismoniy bo‘lmagan) shaklda sotish va qaytarib sotib olish.
Bank va mijoz o‘rtasida o‘lchovli oltin quymalarni sotish va qaytarib sotib olish bankning mobil ilovasida oferta shartnomasini tasdiqlash orqali amalga oshiriladi. To‘lov amalga oshirilgandan so‘ng bankning mobil ilovasida mijoz tomonidan sotib olingan oltin quymaning “maxfiy kodi” ko‘rsatiladi. Bankdan oltin quymalarni olish uchun mijoz shaxsini tasdiqlovchi hujjat va kodni ko‘rsatishi kerak.
Eslatib o‘tamiz, O‘zbekiston qariyb o‘n milliard dollarlik oltin sotgan. Qimmatbaho metall barcha eksportning uchdan bir qismidan ko‘prog‘ini tashkil qiladi.
Izohlar