O‘zbekistonda musiqa va jismoniy tarbiya o‘qituvchilariga sertifikat mavjud bo‘lganda qo‘shimcha haq to‘lanadi
Pedagoglar amaliy va test sinovlaridan muvaffaqiyatli o‘tishi kerak bo‘ladi.
O‘zbekistonda “Musiqa madaniyati” va “Jismoniy tarbiya” fanlari o‘qituvchilari B+ va undan yuqori darajadagi sertifikatga ega bo‘lgan taqdirda ish haqiga qo‘shimcha haq olishlari mumkin bo‘ladi, deyiladi hukumat qarorida.
Ma’lumotlarga ko‘ra, mutaxassislarga amaliy va test imtihonlari natijalariga ko‘ra sertifikatlar beriladi. Hujjatlar Bilim va malakalarni baholash agentligi tomonidan elektron shaklda beriladi va sertifikat uch yil davomida amal qiladi. Baholash shkalasi quyidagicha bo‘ladi: A+ darajasini 70 va undan yuqori ball, A — 65-69,9 ball, B+ — 60-64,9 ball, B — 55-59,9 ball, C+ — 50-54,9 ball va C — 46-49,9 ball to‘plagan nomzodlar olishi mumkin.
Professionallik uchun qo‘shimcha rag‘batlantirish o‘qituvchilarni o‘z mahoratlarini doimiy ravishda takomillashtirishga undashi rejalashtirilgan, bu esa pirovardida maktablarda musiqa va jismoniy tarbiya fanlarini o‘qitish sifatini oshirishga xizmat qiladi.
Avvalroq Shavkat Mirziyoyev pedagoglarni qo‘llab-quvvatlashning yangi choralarini taklif qilgani haqida xabar berilgandi. O‘qituvchilarga ipoteka imtiyozlari, sayohat chegirmalari, qulay kreditlar va ustamalar taqdim etiladi.
Izohlar