O‘zbekistonda 17 ta tijorat banki qoidabuzarlik uchun ogohlantirildi
Markaziy bank o‘z ko‘rsatmalariga rioya qilish bo‘yicha o‘nlab masalalarni ko‘rib chiqdi.
Markaziy bankning Bank nazorati qo‘mitasi tomonidan 2025-yilning may oyida 37 ta masala ko‘rib chiqilgan bo‘lib, ularning yarmidan ko‘pi kredit tashkilotlarining tartibga solish funksiyalari va moliyaviy holati bilan bog‘liq.
Ma’lumotlarga ko‘ra, o‘tgan davr mobaynida qo‘mita 8 ta majlis o‘tkazib, ularda 37 ta masala ko‘rib chiqilgan. Bunda 19 tasi regulyator ko‘rsatmalarining bajarilishi, prudensial normativlarga rioya etilishi, shuningdek, tijorat banklari va mikromoliya tashkilotlarida o‘tkazilgan tekshiruvlar natijalariga bag‘ishlandi.
Natijada 17 ta tijorat banki bank ustav kapitalining eng kam miqdori bo‘yicha talablarga rioya etmagani, muammoli kreditlarni undirish va ularning qoldig‘ini qisqartirish bo‘yicha hududlarda ishlab chiqilgan reja-grafiklarni bajarmagani uchun jarima qo‘llash to‘g‘risida ogohlantirildi.
Shuningdek, regulyator inspeksiya tekshiruvlari davomida aniqlangan qoidabuzarliklar uchun 13 ta bankka nisbatan jarima sanksiyalarini qo‘lladi. Markaziy bank tomonidan ko‘rib chiqilgan yana 18 ta masala ro‘yxatga olish va ruxsat berish tartib-taomillari bilan bog‘liq bo‘lib, ular orasida mikromoliya tashkilotlarini ochish va yopish uchun beshta ariza, kredit tashkilotlari ustav kapitalidagi ulushlarga egalik qilish uchun to‘rtta ruxsatnoma, moliya tashkilotlari ustavlariga kiritilgan uchta o‘zgartirish, shuningdek, rahbarlik va asosiy lavozimlarga yettita nomzod bor edi.
Avvalroq O‘zbekistonda kreditlar haqidagi yolg‘on reklama uchun bank yana jarimaga tortilgani haqida xabar berilgandi. Muassasaga kelgusida bunday xatolarga yo‘l qo‘ymaslik haqida buyruq berildi.
Izohlar