Xitoylik hamkorlar O‘zbekistonda sanoat zonasini qurishda yordam beradi

Shavkat Mirziyoyev Xitoyning “China State Construction”, “China General Nuclear Power”, “CAMCE”, “Goldwind” va “ZTO Express” kompaniyalari rahbarlari bilan uchrashuv o‘tkazdi, deb xabar bermoqda prezident matbuot xizmati.

Ma’lumotlarga ko‘ra, davlat rahbari Xitoy biznesining O‘zbekistonga qiziqishi har doimgidek yuqori ekanini mamnuniyat bilan qayd etdi. O‘tgan yilning o‘zida ushbu mamlakatdan jalb qilingan investitsiyalar hajmi 10 milliard dollardan oshdi. “China State Construction” kompaniyasi direktorlar kengashi raisi Chjen Syuesyuan bilan suhbatda Toshkent shahrida yo‘l infratuzilmasini modernizatsiya qilish borasidagi hamkorlik natijalari yuksak baholandi. Toshkent shahrida madaniyat obyektlarini tashkil etish bo‘yicha istiqbolli rejalar muhokama qilindi.

2024-yilda Xitoydan kiritilgan investitsiyalar hajmi 10 milliard dollardan oshgani ta’kidlandi. Uchrashuvda ikki mamlakat vakillari Toshkent viloyatida sanoat zonasini yaratish loyihasini ishga tushirishga, shuningdek, kompaniyalar avtomobil yo‘llarini qurish loyihalarida ishtirok etishiga kelishib oldi.

“China General Nuclear Power” korporatsiyasi raisi Yan Chanli bilan muzokaralarda tog‘-kon sanoatida sheriklikni mustahkamlash masalalari diqqat markazida bo‘ldi. Geologiya-qidiruv ishlarini jadallashtirish va yangi konlarni o‘zlashtirishga qiziqish bildirildi. Kompaniyaning gibrid quyosh elektr stansiyasini qurish va bojxona yuklarini skanerlash texnologiyalarini joriy qilish rejalari qo‘llab-quvvatlandi.

“CAMCE” korporatsiyasi raisi Van Bo bilan poytaxtda Olimpiya shaharchasini barpo etish bo‘yicha birgalikda amalga oshirilgan ishlar sarhisob qilindi. Kompaniya boshqaruvida Toshkent shahridagi “Yangi avlod” industrial texnoparki jadal rivojlanayotgani qayd etildi. Qo‘shma tashabbuslar portfelini kengaytirish, xususan, elektr energetikasi va Yangi Toshkent shahrini infratuzilmaviy rivojlantirish loyihalarini jadallashtirishga alohida e’tibor qaratildi.

Bundan tashqari, shamol generatorlari ishlab chiqarishni mahalliylashtirish va joriy loyihalarni faollashtirishga kelishib olindi. “ZTO Express” kompaniyasi rahbari X-u Syanlyan davlatimiz rahbariga O‘zbekistonda tovarlarni bojxona rasmiylashtiruvidan o‘tkazishga ko‘maklashish bo‘yicha onlayn platformani ishga tushirish va “aqlli” logistika omborlarini tashkil etish niyati haqida ma’lumot berdi.

Avvalroq 1-iyundan o‘zbekistonliklar Xitoyga vizasiz borishi mumkinligi haqida xabar berilgandi. Mamlakatlar tashrif tartibini tasdiqlagan.