“Uzbekistan Airways” styuardessasiga tegajog‘lik qilgan erkak qamaldi

Sochi – Toshkent yo‘nalishidagi samolyotda bort kuzatuvchisiga shilqimlik qilgan erkakka 5 sutka ma’muriy qamoq jazosi tayinlandi.

Samolyot bortida styuardessaga shilqimlik qilgan erkak ma’muriy jazoga tortildi.

Sud qarorida keltirilishicha, holat 2024 yilning 31 dekabr kuni Sochi – Toshkent yo‘nalishida uchib kelgan samolyot bortida kuzatilgan. 1985 yilda tug‘ilgan J.E. ushbu reysda uchib kelayotib, mast holda styuardessaning tanasini ushlab, unga nisbatan shahvoniy shilqimlik qilgan.

J.E. sudda aybiga iqrorlik bildirmagan hamda qo‘lidagi narsasi polga tushib ketganini, uni olayotganda styuardessaga tegib ketganini bildirgan.

Styuardessa esa J.E. mast holda bir necha marotaba uning yonboshiga qo‘li bilan teginib, shilqimlik qilganini aytgan.

Jinoyat ishlari bo‘yicha Sergeli tuman sudining 2025 yil 7 yanvardagi qaroriga ko‘ra, J.E. MJtKning 41-1-moddasi (shahvoniy shilqimlik qilish) 1-qismida nazarda tutilgan huquqbuzarlikni sodir etgan deb topilgan. Unga 5 sutka ma’muriy qamoq jazosi tayinlangan.

NOVA24 TikTokʼda. Obuna boʻling
Asosiy yangiliklar va qiziqarli videolar