Toshkentdagi universitet mansabdorlariga nisbatan jinoyat ishi qoʻzgʻatildi

Ular 740 mln soʻmlik byudjet mablagʻlarini talon-toroj qilgani aniqlangan.

Samarqand davlat veterinariya meditsinasi, chorvachilik va biotexnologiya universiteti Toshkent filiali mansabdorlariga nisbatan jinoyat ishi qoʻzgʻatildi. Bu haqda Korrupsiyaga qarshi kurashish agentligi matbuot kotibi maʼlum qildi.

Bildirilishicha, agentlikka kelib tushgan murojaatga asosan Iqtisodiy jinoyatlarga qarshi kurashish departamenti bilan hamkorlikda Samarqand davlat veterinariya meditsinasi, chorvachilik va biotexnologiya universiteti Toshkent filiali faoliyati oʻrganilgan.

Oʻrganish natijasida filialning mansabdor shaxslari qonunchilik talablariga zid ravishda 740 mln soʻmlik ish haqini ortiqcha toʻlab yuborib, byudjet mablagʻlarini talon-toroj qilganligi aniqlangan.

Saparovning taʼkidlashicha, hozirgi kunda mazkur holat yuzasidan universitet mansabdor shaxslariga nisbatan Jinoyat Kodeksining tegishli moddasi bilan jinoyat ishi qoʻzgʻatilgan hamda oʻrganish jarayonida toʻplangan hujjatlar prokuraturaga yuborilgan.

NOVA24 TikTokʼda. Obuna boʻling
Asosiy yangiliklar va qiziqarli videolar