Toshkentda maktab direktori bilan janjal qilgan ota qamaldi

Uning rafiqasi, oʻqituvchisi va taʼlim muassasasi rahbari ham jazoga tortildi.

Toshkentda maktab direktori sinfiga bostirib kirib, u bilan janjallashgan ota-onalar jazolandi, deb xabar bermoqda Oliy sud matbuot xizmati.

Ish Jinoyat ishlari boʻyicha Mirobod sudida koʻrib chiqilgan. Direktor xonasiga bostirib kirgan erkak Maʼmuriy javobgarlik toʻgʻrisidagi kodeksning 183-moddasi (Mayda bezorilik) va 194-moddasi 2-qismi (Ichki ishlar organlari xodimining qonuniy talablarini bajarmaslik) bilan aybdor deb topildi. Unga 10 sutka qamoq jazosi tayinlangan.

Uning rafiqasi 183-modda (Mayda bezorilik) bilan aybdor deb topildi va 3 BHM (1 mln 125 ming soʻm) miqdorida jarimaga tortildi. Oʻqituvchi va maktab direktori ham jazolandi. Ularga 41-modda (haqorat qilish) bilan davlat foydasiga 2 BHM (750 ming soʻm) miqdorida jarima solindi.

Eslatib oʻtamiz, hodisa 7-aprel kuni soat 14:40 da Toshkent shahar Mirobod tumanidagi 213-maktabda sodir boʻlgandi. Notanish yigit maktabga oʻrtoqlari oldiga kelib, darslarni toʻxtatib qoʻygan, buning uchun direktor unga tanbeh bergan. Bundan xabar topgan bolaning ota-onasi uning xonasiga bostirib kirib, janjal koʻtarishgan.

NOVA24 Telegramʼda. Obuna boʻling
Tezkor xabarlar va asosiy voqealar