Yashnobod tumanida Kichik halqa avtomobil yoʻlining Maxtumquli koʻchasiga tutashgan qismini qayta qurish ishlari nihoyasiga yetkazildi, deb xabar beradi Toshkent shahar hokimligi matbuot xizmati.

Qayd etilishicha, poytaxt hokimligi huzurida tashkil etilgan “Toshkent invest kompaniyasi” AJ mutaxassislari xalqaro ekspertlar bilan hamkorlikda transport oqimini oʻlchab, oʻrganib chiqqan hamda tahlil qilgan. Obekt qurilishi boʻyicha muhandislik-texnik yechim shahar YHXBB va China Construction bilan hamkorlikda ishlab chiqilgan.

Endi Maxtumquli koʻchasidan Kichik halqa avtomobil yoʻliga chiqish temiryoʻl va avtomobil koʻpriklari ostida oʻtgandan soʻng, oʻngga burilish orqali amalga oshiriladi. KHAYga chiqishda ham oʻngga, ham chapga (svetofor yordamida) burilish mumkin. Ilgari amalda boʻlgan Maxtumqulidan KHAYga chapga burilish esa yopiq.

Kichik halqa avtomobil yoʻlidan Toshkent tibbiyot akademiyasi tomon chiqish esa endi yoʻl oʻtkazgich yonidan emas, balki undan oldinroq boshlanadi.

“Hudud piyodalar ehtiyojlarini inobatga olgan holda obodonlashtirilmoqda, imkoniyati cheklangan shaxslar uchun qoʻshimcha qulayliklar yaratildi”, deyiladi xabarda.