Toshkentda ekskavator sabab ayrim hududlarda gaz ta’minoti to‘xtatildi

Ekskavator gaz quvuriga shikast yetkazishi natijasida Yunusobod tumanining ayrim hududlarida tabiiy gaz taʻminoti vaqtincha toʻxtatildi.

Kecha, 13-noyabr kuni Toshkent shahrida taʻmirlash ishlarini olib borayotgan ekskavator Yunusobod tumani, 2-daha, 40-uy yonidan oʻtgan oʻrta bosimli yerosti gaz quvuriga shikast yetkazishi natijasida gaz sizib chiqish holati kuzatilgan.

Natijada ushbu dahadagi 47 ta koʻp qavatli xonadon, 10 ta ulgurji isteʻmolchi, 3-dahadagi 26 ta koʻp qavatli xonadon, 12 ta ulgurji isteʻmolchi va Malikov koʻchasidagi 40 ta yerli xonadonda gaz taʻminoti vaqtincha toʻxtatilgan.

Ayni vaqtda “Hududgaz Poytaxt” gaz taʻminoti filiali xodimlari tomonidan taʻmirlash ishlari olib borilmoqda.

Taʻmirlash ishlari yakunlangach gaz taʻminoti qayta tiklanadi.

NOVA24 Instagramʼda. Obuna boʻling
Asosiy yangiliklar va qiziqarli videolar