Toshkentda chiptasizlar uchun reydlar boshlandi

Inspektorlar yoʻl haqini toʻlamagan yoʻlovchilarni bekatlarda tutib olmoqda.

Toshkentda avtobuslarda chiptasiz yurganlarga qarshi reydlar boshlandi, deb xabar bermoqda Transport nazorati inspeksiyasi matbuot xizmati.

2025-yil boshidan poytaxtda jamoat transportida yoʻl haqini naqd pulda toʻlashdan butunlay voz kechildi. Endi yoʻlovchilar yoʻl haqini elektron shaklda yoki bir martalik QR-chiptalar orqali toʻlashlari mumkin.

Hozir yoʻlovchilarning aksariyati yoʻl haqini oʻz vaqtida toʻlamoqda, biroq soʻnggi paytlarda ayrim fuqarolar hech qanday sababsiz yoʻl haqini toʻlamasdan avtobusdan chiqib ketish holatlari tez-tez kuzatilmoqda. Inspeksiya hamda Jamoat transportini monitoring va nazorat qilish davlat muassasasi xodimlari tomonidan Toshkent shahri boʻylab avtobuslarda kuchaytirilgan reyd tadbirlari boshlandi.

Yoʻlkira haqini bir martalik QR-chiptalar orqali toʻlayotgan yoʻlovchilardan chiptalarni butun safar davomida yonlarida saqlab, nazoratchi va inspektorlar talabiga koʻra koʻrsatish soʻralgan.

Qonunchilikka koʻra, yoʻlovchining chiptasiz shahar yoki shahar atrofiga qatnovchi avtobusda yurishi BHMning 1/10 qismi (37,5 ming soʻm) miqdorida jarima solishga sabab boʻladi. Yoʻlovchilardan tartibga rioya qilish va yoʻl haqini oʻz vaqtida toʻlash soʻralgan.

NOVA24 Telegramʼda. Obuna boʻling
Tezkor xabarlar va asosiy voqealar