4 Dekabr 2023, 11:24 •Oʻzbekiston

Тошкент шаҳрига 2024 йилда яна 200 та электробус олиб келинади

Пойтахт жамоат транспорти босқичма-босқич тўлиқ «яшил транспорт» тизимига ўтказилади.

Ҳозирда «Тошшаҳартрансхизмат» автобус саройи филиалларида 2017 та ҳаракат таркиби мавжуд. Уларнинг 672 таси дизелда (33 фоиз), 1020 таси табиий газда (50 фоиз), 324 таси электр энергиясида (17 фоиз) ҳаракатланади.

2022—2023 йилларда сотиб олинган автобусларнинг 58,7 фоизи сиқилган табиий газда, 21,4 фоизи электр энергиясида ҳаракатланади. Мазкур чора-тадбирлар сабаб ҳаракат таркибининг ўзидан чиқадиган зарарли моддалар миқдори 2022 йилда 5,1 минг тоннани, 2023 йилда эса яна қисқариб, 4,8 минг тоннани ташкил этган.

2024 йилда ҳаракат таркибини 200 дона электробус билан янгилаш орқали зарарли моддалар миқдорини йиллик 4,6 минг тоннагача камайишига эришиш режалаштирилган. 2024-2030 йилларда қўшимча 1 200 дона электробус харид қилиш ва автобусларни табиий газ ёнилғисига ўтказиш кўзда тутилган.