To‘qqizta vazirlikning hududiy bo‘linmalari hokimliklar boshqaruviga beriladi
2026-yil oxirigacha bu amaliyotni butun mamlakat bo‘ylab joriy etish rejalashtirilgan.
O‘zbekistonda hokimiyatlar ayrim vazirlik va idoralarning hududiy bo‘linmalari faoliyatini boshqarish huquqiga ega bo‘ladi, deb xabar bermoqda O‘zA.
Ma’lumotlarga ko‘ra, hokimiyat 2026-yil oxirigacha mamlakatning 32 ta tuman va shahrida yangi tartibni joriy etadi. Qayd etilishicha, hozirda mutasaddi idoralar tomonidan hokimliklar faoliyatini takomillashtirish bo‘yicha tegishli prezident qarori loyihasi ishlab chiqilmoqda.
Xususan, hokimliklar tuzilmasiga 9 ta vazirlik va idoralarning hududiy bo‘linmalarini o‘tkazish rejalashtirilmoqda:
- Iqtisodiyot va moliya vazirligi;
- Investitsiyalar, sanoat va savdo vazirligi;
- Qishloq xo‘jaligi vazirligi;
- Kambag‘allikni qisqartirish va bandlik vazirligi;
- Qurilish va uy-joy kommunal xo‘jaligi vazirligi;
- Ekologiya, atrof-muhitni muhofaza qilish va iqlim o‘zgarishi vazirligi;
- Madaniyat vazirligi;
- Oila va xotin-qizlar qo‘mitasi;
- Yoshlar ishlari agentligi.
Qayd etilishicha, hokimliklar ushbu bo‘linmalar uchun shtat birliklari sonini mustaqil ravishda belgilaydi, shuningdek, xodimlarni lavozimga tayinlaydi va ishdan bo‘shatadi hamda ularni rag‘batlantirish yoki intizomiy jazo choralarini qo‘llaydi.
Avvalroq hokimlik xodimlariga ko‘proq maosh to‘lanishi haqida xabar berilgandi. Ularga ham ish fronti kengaytiriladi.
Izohlar