Surxondaryoda zamonaviy turistik markazlar tashkil etiladi

Prezident qarori bilan Surxondaryo viloyatining 3 ta tumanida turistik markazlar tashkil etiladi.

“Surxondaryo viloyatining togʻli-rekreatsion hududlarida turizm infratuzilmasini yaxshilash hamda zamonaviy xizmat koʻrsatish va turizm obyektlarini barpo etish chora-tadbirlari toʻgʻrisida”gi Prezident qarori [PQ-439-son, 16.12.2024-y.] qabul qilindi. Bu haqda “Huquqiy axborot” kanalida xabar berildi.

Qarorga koʻra, quyidagilar tashkil etiladi:

• Boysun tumani hududidagi umumiy maydoni 220,5 gektar boʻlgan yer uchastkasida “Omonxona” turistik markazi;
• Sariosiyo tumani hududidagi umumiy maydoni 615 gektar boʻlgan yer uchastkasida “Sangardak” turistik markazi;
• Jarqoʻrgʻon tumani Obihayot mahallasidagi “Oqtepa” suv omborining qirgʻoq boʻyi hududidagi 110 gektar yer uchastkasida “Obihayot” turistik markazi;
• “Omonxona”, “Sangardak” va “Obihayot” turistik markazlarini rivojlantirish va boshqarish uchun davlat muassasasi shaklida Surxondaryo viloyatida turizm infratuzilmasini rivojlantirish va boshqarish direksiyasi.

Turistik markazlar hududlarida tadbirkorlik va shaharsozlik faoliyatini amalga oshirish uchun moʻljallangan boʻsh yer uchastkalari mulk huquqi yoki ijara huquqi asosida elektron onlayn auksion orqali realizatsiya qilinadi.

Xususiy investitsiyalarni jalb qilgan holda 2025–2027-yillarda mehmonxonalar, oilaviy mehmon uylari, xizmat koʻrsatish majmualari va dam olish maskanlarini qurish maqsadida boʻsh yer uchastkalari 10-yil muddatda teng ulushlarda boʻlib-boʻlib toʻlash sharti bilan elektron onlayn auksion savdolariga chiqariladi.

NOVA24 YouTubeʼda. Obuna boʻling
Asosiy yangiliklar va qiziqarli videolar