Shavkat Mirziyoyev Xorijiy investorlar kengashi yalpi majlisini o‘tkazdi — asosiylar

11-iyun kuni Xalqaro kongress markazida O‘zbekiston prezidenti huzuridagi Xorijiy investorlar kengashining uchinchi yalpi majlisi bo‘lib o‘tdi.

Ma’lumotlarga ko‘ra, davlat rahbari raisligida o‘tgan tadbirda Yevropa tiklanish va taraqqiyot banki prezidenti Odil Reno-Basso, “Masdar”, “Indorama”, “ACWA Power”, “Vision Invest”, “DataVolt”, “Veon”, “Boeing”, “Air Products”, “SpaceX”, “Meta”, “John Deere”, “Franklin Templeton”, “Suez”, “EDF”, “Total Energies”, “Voltalia”, “Orano”, “Linde”, “Claas”, “Sojitz”, “Bomi”, “OTP Bank”, “Goldwind”, “Çalik”, “Çengiz”, “Aksa”, “JBIS” kabi yetakchi kompaniya va banklar rahbarlari, shuningdek, xalqaro tashkilotlar va moliya institutlari – Iqtisodiy hamkorlik va taraqqiyot tashkiloti, Xalqaro moliya korporatsiyasi, Osiyo taraqqiyot banki, Islom taraqqiyot banki va Xalqaro islom savdo-moliya korporatsiyasi vakillari ishtirok etdi.

Qayd etilishicha, kengashning asosiy vazifalari muvaffaqiyatli tajriba va jahon amaliyotidan kelib chiqqan holda mamlakatni investitsiyaviy, sanoat-texnologik va innovatsion rivojlantirishning eng muhim yo‘nalishlari bo‘yicha maslahat berish hamda O‘zbekiston Hukumati bilan xorijiy investorlar o‘rtasida ochiq muloqotni ta’minlashdan iborat.

Davlat rahbari majlisni ochar ekan, kuni kecha o‘tgan to‘rtinchi Toshkent investitsiya forumining samarali natijalarini qayd etdi hamda kengash a’zolariga Yangi O‘zbekiston taraqqiyotiga qo‘shayotgan hissasi va ko‘magi uchun minnatdorlik bildirdi. Kengashning avvalgi yig‘ilishlari natijador bo‘lgani mamnuniyat bilan qayd etildi. Xususan, xalqaro moliya tashkilotlari bilan ishlashning mutlaqo yangi formatiga o‘tildi, samarali hamkorlik tizimi joriy etildi, o‘zaro manfaatli sheriklik tarmoqlari kengaydi.

Shuningdek, xalqaro moliya tashkilotlarining xususiy sektor bilan hamkorligi kuchaytirilgani ta’kidlandi. Xususiy kompaniya va banklar bilan yillik qo‘shma loyihalar hajmi 1 milliard dollardan oshgani qayd etildi. Shuningdek, bu galgi majlisda ishtirok etayotgan kompaniyalar «yashil» energetika, chiqindilarni qayta ishlash, elektr energiyasini saqlash, «yashil» vodorod ishlab chiqarish va boshqa sohalarda yangi loyihalarni boshladi. Xususan, «ACWA Power», «Masdar», «Linde», «Shanghai Renewable Energy» va «Total Energies» kompaniyalari 8 milliard dollardan ziyod investitsiya kiritib, «yashil» iqtisodiyot rivojiga katta hissa qo‘shmoqda.

O‘zbekiston raqamli texnologiyalar sohasiga jahonga mashhur nufuzli kompaniyalar ham faol kirib kelayotgani ta’kidlandi. Shunday qilib, DataVolt mintaqadagi eng yirik «yashil» ma’lumotlar markazini yaratish bo‘yicha loyihalarni, Veon esa sun’iy intellektga asoslangan mobil superilovani yaratish bo‘yicha loyihalarni amalga oshirmoqda. Davlatimiz rahbari buni xorijiy investorlarning mamlakatimizda olib borilayotgan islohotlar va ochiqlik siyosatiga yuksak ishonchi ifodasi, deb hisoblashini ta’kidladi.

Xalqaro moliya korporatsiyasi, «Ernst&Young,» «Dentons,» «Knauf» va «TBC» kompaniyalari tomonidan milliy qonunchilikni xalqaro standartlar asosida yanada takomillashtirish bo‘yicha takliflar berildi. Ularning yangi tashabbus va g‘oyalari 10 dan ortiq qonun, farmon va qarorlarda o‘z ifodasini topdi.

Davlat rahbari biznes uchun bazaviy soliq stavkalari 2028 yilgacha o‘zgarmasligini ma’lum qildi. Bundan tashqari, so‘nggi 2 yilda investitsiya muhitining yaxshilanishi natijasida O‘zbekistonda xorijiy kapital ishtirokida 5,5 mingta yangi korxona tashkil etilgani, ularning umumiy soni 16 mingtaga yetgani ta’kidlandi.

Ta’kidlanganidek, navbatdagi uchrashuvga tayyorgarlik doirasida mutaxassislar tomonidan xorijiy hamkorlarning 40 dan ortiq tashabbuslari saralandi. Xususan, investorlar tomonidan soliq qonunchiligi barqarorligini ta’minlash, to‘g‘ridan-to‘g‘ri amal qiluvchi qonunlar sonini ko‘paytirish, infratuzilma loyihalarida xususiy sektor ishtirokini kengaytirish bo‘yicha takliflar bildirildi.

2025-yilda yo‘l qurilishi, transport, energetika, suv ta’minoti, irrigatsiya va boshqa sohalarda qariyb 4,5 milliard dollarlik davlat-xususiy sheriklik loyihalari muvaffaqiyatli boshlandi. Bundan tashqari, moliyaviy hisobotning, shuningdek, ekologik, ijtimoiy va korporativ boshqaruvning xalqaro standartlariga o‘tish bo‘yicha normativ-huquqiy hujjatlar ishlab chiqilmoqda.

Kelib tushgan takliflar asosida garov to‘g‘risidagi qonunchilikni takomillashtirish, xorijiy kompaniyalar uchun professional kadrlar tayyorlash, mahalliy kompaniyalarda korporativ boshqaruvni yaxshilash, soliq ma’muriyatchiligi bo‘yicha qo‘shimcha ishchi guruhlar tuzish rejalashtirilgan. Shuningdek, tadbir doirasida Kengash Kotibiyatining mustaqilligini oshirish va uni alohida yuridik shaxs sifatida qayta tashkil etish taklifi ilgari surildi.

So‘zga chiqqan kengash a’zolari Yangi O‘zbekistonda amalga oshirilayotgan keng ko‘lamli islohotlar dasturining natijalarini yuksak baholab, investitsiyaviy faoliyatni har tomonlama qo‘llab-quvvatlayotgani va o‘zaro manfaatli hamkorlikni davom ettirishga qat’iy intilgani uchun davlatimiz rahbariga minnatdorlik bildirdi. Hukumatga barcha tashabbuslarni batafsil ko‘rib chiqib, ularning amaliy ijrosini nazoratga olish, har bir loyiha bo‘yicha alohida «yo‘l xaritasi» qabul qilish topshirildi.

Avvalroq Mirziyoyev Toshkent xalqaro investitsiya forumida nutq so‘zlab, mamlakat 2026-yilda JSTga a’zo bo‘lishni rejalashtirayotganini ma’lum qilgani haqida xabar berilgandi. Prezident O‘zbekiston «Yangi O‘zbekiston – investitsiyalar uchun katta imkoniyatlar mamlakati» tamoyilini amalga oshirish uchun barcha choralarni ko‘rayotganini ta’kidladi.