Shavkat Mirziyoyev pedagoglarni qo‘llab-quvvatlashga qaratilgan yangi tashabbuslarni ilgari surdi

Shavkat Mirziyoyev 15-sentyabr kuni Toshkent viloyatida o‘tkazilgan yig‘ilishda o‘qituvchilarni yanada qo‘llab-quvvatlashga qaratilgan yangi tashabbuslarni ilgari surdi, deb xabar bermoqda prezident matbuot xizmati.

Unga ko‘ra, 2026-yildan boshlab kamida 15 yil ish stajiga ega bo‘lgan oliy toifali pedagoglarga ipoteka krediti bo‘yicha dastlabki badalning 25 foizi qoplab beriladi. Davlat oliygohlariga o‘qishga kirgan pedagoglarning farzandlariga to‘lov-kontrakt summasidan 30 foiz chegirma beriladi. Shuningdek, ro‘yxatdan quyidagilar kelib chiqadi:

• o‘qituvchilar yangi ta’lim texnologiyalarini keng qo‘llashi uchun kompyuter xaridiga 10 million so‘mgacha imtiyozli kredit ajratiladi;
• kelasi yildan pedagoglar uchun davlat xizmatlari to‘lovi 2 karra kamaytiriladi;
• fan o‘qituvchilari kabi boshlang‘ich ta’lim o‘qituvchilari uchun ham milliy sertifikat berish tizimi joriy qilinadi. Sertifikat olganlarga har oyda 15 foiz ustama to‘lanadi;
• bakalavr bosqichini imtiyozli diplom bilan bitirib, maktabga ishga kirganlarga avtomatik ravishda 2-malaka toifasi, magistrlarga esa 1-malaka toifasi beriladi;
• dunyodagi TOP-300 talik oliygohlarga o‘qishga kirgan pedagoglarga 20 ming dollargacha imtiyozli ta’lim krediti ajratiladi;
• reytingda 100 talikka kirgan maktab va bog‘cha, 20 talikdagi texnikum, TOP-10 ta oliygoh pedagoglariga yiliga bir marta O‘zbekiston bo‘ylab sayohat qilish uchun samolyot va poyezdlar chipta narxlariga 15-20 foiz chegirma beriladi.

Eslatib o‘tamiz, prezident maktablarda YDI joriy etilishini e’lon qilgandi. Maktabda imtihon natijalariga ko‘ra, bitiruvchilar o‘z xohishiga binoan texnikumlarga yoki oliy o‘quv yurtlariga o‘qishga kirishi mumkin.