Shavkat Mirziyoyev Andijon viloyatini rivojlantirishga oid reja va loyihalarni ko‘zdan kechirdi

Shavkat Mirziyoyev 7-avgust kuni Navoiy viloyatida amalga oshirilayotgan islohotlar natijadorligi va yangi rejalar muhokamasi yuzasidan yig‘ilish o‘tkazdi.

Yig‘ilishda so‘nggi yetti yilda Navoiy viloyatida 8 milliard dollarlik 7 mingdan ziyod loyiha amalga oshirilib, 73 mingta ish o‘rni yaratilgani, tadbirkorlar soni 10 mingdan 30 mingtaga ko‘paygani ta’kidlandi. Mutasaddilar 2025-yil boshidan buyon viloyatda investitsiyalar hajmi 643 million dollarga yetgani, eksport 635 million dollardan oshganini ma’lum qildi.

Shuningdek, viloyatda 550 million dollarlik yangi ishlab chiqarish quvvatlari, shuningdek, 1140 ta savdo va xizmat ko‘rsatish obyektlari ishga tushirildi. Shu bilan birga, hali foydalanilmayotgan resurslar ko‘pligi ta’kidlanib, prezident nafaqat yirik sanoatni rivojlantirish, balki yaylovlarni o‘zlashtirish, chorvachilikni rivojlantirish, xizmatlar turini ko‘paytirish bo‘yicha topshiriqlar berdi.

Xususan, viloyatda jami foydali qazilmalarning 20 foizi, yaylovlarning 43 foizi to‘plangani, yirik korxonalar va rivojlangan infratuzilma tarmoqlarda ham talab borligi qayd etildi. Bu imkoniyatlarni ishga solish maqsadida Navoiy viloyatida islohotlar shtabi tuzildi. Yig‘ilishda tadbirkorlar takliflari asosida ishlab chiqilgan yangi loyihalar taqdimoti o‘tkazildi.

Investorlar G‘ozg‘on, Nurota, Xatirchi, Navbahor va Uchquduqdagi sakkizta konni o‘zlashtirishga 566 million dollar sarmoya kiritishga tayyorligini bildirdi. Ushbu loyihalar sanoat mahsulotlari ishlab chiqarish hajmini 2,5 trillion so‘mga, eksportni 100 million dollarga oshirish imkonini berishi qayd etildi. Nurota tumanida 750 million kubometr granit toshi zaxirasi borligi sababli, rasmiylar uni qayta ishlash uchun 50 gektar maydonda sanoat zonasini tashkil etishni taklif qildi.

Mutasaddilar tumandagi 10 ta mahallada 5 mingdan ziyod xotin-qiz kasanachilik bilan shug‘ullanib, ro‘zg‘or tebratayotgani haqida ham ma’lumot berdi. Shu bois hududdagi 28 ta mahallada Kashtachilik markazlari ochilishi rejalashtirilgan. Bundan tashqari, ehtiyojmand oilalarni kambag‘allikdan chiqarish uchun quyosh panellari va ko‘chma savdo pavilonlari bilan ta’minlash ko‘zda tutilgan.

Viloyatdagi 3 million gektar yaylov qishloq xo‘jaligi uchun katta zaxira. Qiziltepalik tadbirkor ming gektar maydonda yomg‘irlatib va tomchilatib sug‘orishni yo‘lga qo‘yib, eksportbop ekinlar ekayotganini ta’kidlab, chorvachilik va sutni qayta ishlash bilan shug‘ullanishga tayyorligini bildirdi.

Qayd etilganidek, viloyatda 1,6 milliard dollarlik qo‘shimcha loyihalar shakllantirilgan bo‘lib, ularning amalga oshirilishi 10 mingta yangi ish o‘rni, shuningdek, byudjetga 1 trillion so‘m tushum va 238 million dollarlik eksportni ta’minlaydi. Shu bois prezident loyihalarning iqtisodiy samaradorligini oshirish bo‘yicha ko‘rsatmalar berdi.

Bundan tashqari, rasmiylar yirik va kichik korxonalar o‘rtasida kooperatsiya yo‘qligini ta’kidladi. Davlat rahbari kichik tadbirkorlarni yirik ishlab chiqaruvchilar bilan bog‘lab, kafolatli buyurtma tizimini joriy etish, viloyat iqtisodiyotida kichik biznes ulushini ikki barobar oshirish bo‘yicha ko‘rsatmalar berdi. Yaylovlarni suv bilan ta’minlash, ulardan samarali foydalanish va oziq-ovqat mahsulotlari yetishtirishni ko‘paytirishga ko‘maklashish zarurligi ta’kidlandi.

Shuningdek, Navoiy viloyatida o‘rtacha ish haqi boshqa hududlarga nisbatan 1,5 barobar yuqoriligi, bu ham talab, ham taklifni rag‘batlantirayotganini inobatga olib, zamonaviy dam olish maskanlarini tashkil etish, turizmni rivojlantirish va xizmat ko‘rsatishni kengaytirish bo‘yicha mutasaddilarga topshiriqlar berildi.

Avvalroq O‘zbekiston sun’iy intellekt infratuzilmasini rivojlantirish uchun o‘nlab million dollar ajratishi haqida xabar berilgandi. Shavkat Mirziyoyev sun’iy intellekt va raqamli texnologiyalar sohasidagi rejalar bilan tanishdi.