Shavkat Mirziyoyev 9-may munosabati bilan O‘zbekiston xalqini tabrikladi
Davlat rahbari mamlakatda barpo etilayotgan yodgorliklar, bog‘lar muhimligini ta’kidladi.
Shavkat Mirziyoyev koʻpmillatli Oʻzbekiston xalqini muqaddas bayram – Xotira va qadrlash kuni hamda Ikkinchi jahon urushidagi Buyuk Gʻalabaning 80 yilligi bilan tabrikladi, deb xabar qildi Prezident matbuot xizmati.
Davlat rahbari barcha fuqarolarga o‘zining yuksak hurmati va ezgu tilaklari, urush va mehnat faxriylariga alohida minnatdorchilik va tabriklar izhor etdi.
Mana shu hayajonli, ayni paytda iztirobli damlarda insoniyatni fashizm balosidan xalos etishga munosib hissa qo‘shgan qahramon ajdodlarimizni yod etib, ularning yorqin xotirasi oldida ta’zim qilamiz, dedi davlat rahbari.
Hujjatlarning dalolat berishicha, fashizmga qarshi qonli janglarda o‘sha paytda 6 million 800 ming nafarni tashkil etgan aholimizning qariyb 2 million nafari ishtirok etgan. Shundan 540 mingga yaqini halok bo‘lgan, 158 ming nafari bedarak yo‘qolgan, 50 mingdan ortig‘i konslagerlarda mislsiz qiynoq va azoblar tufayli halok bo‘lgan, 60 mingdan ziyodi nogiron bo‘lib qaytgan. O‘zbekistonlik askar va ofitserlardan 214 mingga yaqini jangovar orden va medallar bilan mukofotlangani, 301 nafari Sovet Ittifoqi Qahramoni degan yuksak unvonga, 70 nafardan ziyodi uchala darajadagi “Slava” ordeniga sazovor bo‘lgani, hech shubhasiz, yurtimiz vakillari tomonidan urush maydonlarida ko‘rsatilgan jasorat va matonatning yuksak amaliy e’tirofidir.
Bundan tashqari, mamlakat urush yillarida frontning mustahkam ta’minot bazasiga aylangani, respublikamizdan jang maydonlariga juda katta miqdorda harbiy texnika, qurol-yarog‘, dori-darmon, kiyim-kechak, oziq-ovqat va boshqa zarur mahsulotlar yetkazib berilgani o‘sha suronli davrning yana bir unutilmas sahifasini tashkil etadi. Urush olovi ichida qolgan hududlardan yurtimizga 170 dan ortiq zavod va fabrika ko‘chirib keltirildi, qisqa muddatda 280 ta yangi korxona bunyod etildi.
Xalqimiz g‘oyat og‘ir va murakkab sharoitda urush hududlaridan o‘lkamizga olib kelingan 1 million 500 mingga yaqin insonni, jumladan, ota-onasidan judo bo‘lgan 250 ming nafar yetim bolani bag‘riga olib, ularga mehr-muruvvat ko‘rsatdi.
Tarix kitobiga muhrlangan bunday misollarni bugun yana bir bor esga olar ekanmiz, har qanday vaziyatda ham insoniy e’tiqodiga sodiq qolgan olijanob va bag‘rikeng xalqimizning buyuk gumanistik fazilatlariga tahsin va tasannolar aytamiz, dedi Prezident.
Davlat rahbari Toshkent shahrida barpo etilgan G‘alaba bog‘i, hududlardagi “Vatanparvar” bog‘lari qisqa vaqt ichida fuqarolar va xorijlik mehmonlarning ziyoratgohiga aylanganini ham ta’kidladi. “G‘alaba” istirohat bog‘i hududida Vatan himoyachilari sharafiga barpo etilgan “Millat fidoyilari” majmuasi ham bu boradagi ishlarimizning davomi sifatida alohida ta’kidlandi.
Qayd etilishicha, joriy yilda Ikkinchi jahon urushining har bir ishtirokchisi va nogironiga 10 ming AQSh dollari miqdorida, ushbu toifadagi shaxslarga 25 million so‘m, mehnat fronti qatnashchilariga 3 million so‘m hamda “Ikkinchi jahon urushi g‘alabasi” yubiley medali topshirilishi ham ana shunday amaliy g‘amxo‘rlik va g‘amxo‘rlikning yana bir muhim omilidir. hurmatli faxriylar. Bundan tashqari, urush qatnashchilari va nogironlariga tibbiy-ijtimoiy xizmatlar, jumladan, uy sharoitida xizmat ko‘rsatilmoqda. Agar xohlasalar, sanatoriylarda davolanadilar.
Tegishli vazirlik, idora va tashkilotlar, harbiy qismlar rahbarlari tomonidan istiqlol yillarida xizmat burchini bajarish chog‘ida halok bo‘lgan urush va mehnat faxriylari, harbiy xizmatchilarning oila a’zolari, huquqni muhofaza qiluvchi organlar xodimlarining holidan xabar olinib, ularga zarur yordam va ko‘mak ko‘rsatilmoqda.
Albatta, biz bugungi tinch, ozod va erkin hayot uchun o‘zining aziz jonini ham ayamasdan kurashgan bunday fidoyi insonlarning oldida doimo qarzdormiz. Ular bundan buyon ham davlatimiz va jamiyatimizning mehrini, e’tiborini his qilib yashaydi, dedi Shavkat Mirziyoyev.
Eslatib o‘tamiz, avvalroq Shavkat Mirziyoyev “Matonat madhiyasi” yodgorligi poyiga gul qo‘ygani xabar qilingandi. Prezident istirohat bog‘ida o‘rnatilgan “Xotira nuri” kompozisiyasini ham ko‘zdan kechirdi.
Izohlar