Samarqandda YUNESKOning yangi rahbari tayinlandi
Endi tashkilotga Xolid al-Anani rahbarlik qiladi.
YUNESKOning yangi bosh direktori etib misrlik taniqli professor Xolid al-Anani saylandi, deb xabar bermoqda “Dunyo”.
Ma’lumotlarga ko‘ra, Xolid al-Anani 174 ta byulletendan 172 tasini qo‘lga kiritgan va YUNESKOning 12-bosh direktori bo‘lgan. Qayd etilishicha, tashkilotning yangi rahbari taniqli misrshunos va Xeluan universitetining misrshunoslik professori bo‘lib, u yerda 30 yildan ortiq vaqt davomida dars berib kelmoqda.
U o‘z lavozimiga 15 noyabr kuni to‘rt yillik muddatga kirishadi va 2017 yildan beri YUNESKOni boshqargan Odri Azule o‘rnini egallaydi. Mutaxassis ilgari Misr sivilizatsiyasi milliy muzeyi, shuningdek, Qohiradagi Misr muzeyini boshqargan. 2016-yildan 2022-yilgacha u Misrning qadimiy yodgorliklar vaziri, keyin esa turizm va qadimiy yodgorliklar vaziri lavozimlarida ishlagan.
2024-yil noyabr oyida Jahon sayyohlik tashkiloti uni madaniy turizm bo‘yicha maxsus elchi etib tayinladi va keyinchalik u Afrika Jahon merosi jamg‘armasining homiysiga aylandi. Qayd etilishicha, al-Anani bir qator xalqaro ilmiy jamiyatlar a’zosi, arab, fransuz va ingliz tillarini biladi va bir nechta xalqaro mukofotlarga sazovor bo‘lgan.
Avvalroq Shavkat Mirziyoyev YUNESKO Bosh konferensiyasida qator tashabbuslarni ilgari surgani haqida xabar berilgandi. Prezidentning takliflari hamkorlikning turli jihatlarini qamrab oldi.
Izohlar