Samarqandda YPX xodimini kapotda “sayr qildirgan” haydovchi sudlandi

Erkak oilaviy janjal tufayli uyiga shoshayotganini aytgan.

Samarqandda uyga shoshilayotgan YPX xodimini urib yuborgan Onix haydovchisiga hukm oʻqildi.

Maʼlumotlarga koʻra, voqea 31-yanvar kuni Buyuk Ipak yoʻli koʻchasida sodir boʻlgan. YPX inspektori Onix haydovchisiga toʻxtash ishorasini berdi. Biroq yoʻlda raqamsiz ketayotgan erkak huquq-tartibot xodimining talabiga boʻysunmay, uni bosib ketgan.

Huquqbuzar YPX xodimini kapotda biroz masofaga sudrab borgan va shundan soʻng voqea joyidan yashiringan. Hodisa oqibatida huquq-tartibot idorasi xodimi tan jarohati olgan.

Erkak oʻzini oqlash uchun otasi mast holda onasini urayotganini bilgani uchun uyiga shoshilganini aytdi. Qonunbuzar qilmishiga pushaymon boʻlib, suddan afv soʻradi. YPX xodimi, oʻz navbatida, erkakka nisbatan hech qanday daʼvosi yoʻqligini aytib, suddan unga ozodlikdan mahrum qilish bilan bogʻliq boʻlmagan jazo tayinlashni soʻradi.

Jinoyat ishlari boʻyicha Samarqand shahar sudi erkakni Jinoyat kodeksining 219-moddasi 2-qismi (Hokimiyat vakiliga yoki fuqaroviy burchini bajarayotgan shaxsga qarshilik koʻrsatish) bilan aybdor deb topib, unga 3 yil muddatga ozodlikni cheklash jazosi tayinladi.

NOVA24 Telegramʼda. Obuna boʻling
Tezkor xabarlar va asosiy voqealar