Rossiyada qarovsiz qolgan ikki nafar bola Oʻzbekistonga olib kelindi

Ularning ikkalasi ham politsiya tomonidan oʻtkazilgan reyd davomida Voyaga yetmagan huquqbuzarlarni vaqtincha saqlash markaziga yuborilgan.

Rossiya Federatsiyasida ota-ona qaramogʻisiz qolgan 2 nafar bola Oʻzbekistonga olib kelindi. Bu haqda Ijtimoiy himoya milliy agentligi axborot xizmati xabar berdi.

Qayd etilishicha, bolalarning biri ota-onasining ishonchnomasi asosida Rossiyaga ketgan. Ikkinchisi esa 2023-yildan beri mehnat migratsiyasida, 9-sinf oʻquvchisi boʻlganidayoq opasining turmush oʻrtogʻi bilan Moskvaga borib, dastlab farrosh, keyinchalik esa qahvaxonada idish-tovoq yuvuvchi sifatida ishlab yurgan.

Ikkala fuqaro ham politsiya tomonidan oʻtkazilgan reyd davomida Voyaga yetmagan huquqbuzarlarni vaqtincha saqlash markaziga yuborilgan.

Ular kecha, 26-fevral kuni Rossiya Ichki ishlar vazirligining Moskva shahridagi Voyaga yetmagan huquqbuzarlarni vaqtincha saqlash markazi xodimlari koʻmagida Oʻzbekistonga olib kelingan.

NOVA24 Instagramʼda. Obuna boʻling
Asosiy yangiliklar va qiziqarli videolar