Qashqadaryoda 3 kishini o‘qishga kiritib qo‘yish evaziga 3,8 ming dollar olganlar ushlandi

Qashqadaryo viloyatida 3 kishini texnikumga o‘qishga kiritib qo‘yish evaziga 3,8 ming dollar olgan shaxslar qo‘lga olindi.

Qashqadaryo viloyatining Shahrisabz shahridagi “Abu Ali ibn Sino” nomidagi jamoat salomatligi texnikumiga o‘qishga kiritib qo‘yishni vaʼda qilgan shaxslar aniqlandi. Bu haqda Bosh prokuratura huzuridagi Iqtisodiy jinoyatlarga qarshi kurashish departamenti xabar berdi.

Maʼlum qilinishicha, fuqaro Sh.Yu. va boshqalar I.X., K.H. va M.Yo.ning ishonchiga kirib, ularni go‘yoki yuqori lavozimda ishlovchi tanishlari yordamida Shahrisabzdagi “Abu Ali ibn Sino” nomidagi jamoat salomatligi texnikumiga o‘qishga kiritib qo‘yishni vaʼda qilgan.

Buning evaziga jami 3 800 dollarni firibgarlik yo‘li bilan qo‘lga kiritgan. Holat aniqlangach ushbu pullarning to‘liq qaytarilishi taʼminlangan.

Mazkur holat yuzasidan Jinoyat kodeksining 168-moddasi (firibgarlik) va 28, 211-moddasi (pora berish) bilan jinoyat ishi qo‘zg‘atilib, tergov harakatlari o‘tkazilmoqda.

NOVA24 YouTubeʼda. Obuna boʻling
Asosiy yangiliklar va qiziqarli videolar