Oliy ta’lim vaziri talabalarni pora evaziga o‘qishga qabul qilmaslikni so‘radi

Oliy ta’lim, fan va innovatsiyalar vaziri Qo‘ng‘irotboy Sharipov tizimda korrupsiya holatlari ko‘paygani sababli ochiq murojaat bilan chiqdi.

“So‘nggi tomchi” Toshkent davlat iqtisodiyot universiteti va Farg‘ona universitetining ikki xodimi abituriyentlarga 4000 va 3800 dollar evaziga o‘qishga kirishni taklif qilgani uchun hibsga olingani bo‘ldi. Avvalroq Andijon universitetida yillar davomida milliardlab so‘mlarni o‘zlashtirgan bosh buxgalter boshchiligidagi 12 kishidan iborat butun boshli uyushgan jinoiy guruh fosh etilgandi.

Qo‘ng‘irotboy Sharipov bunday holatlarni “noqonuniy va mutlaqo kechirib bo‘lmaydigan” deb atadi, ular butun oliy ta’lim sohasiga soya soladi.

“Biz sizlardan bilim va tarbiya berish orqali jamiyatga xizmat qilishni kutamiz, jinoyat sodir etishni emas. Har bir pedagog bu muqaddas kasb ortida yurt kelajagi, inson taqdiri turganini chuqur his qilishi kerak. Oliy ta’lim tizimidagi har bir rahbar va xodim korrupsiyaga qarshi shaxsiy mas’uliyat bilan yondashishi, bu borada faqat qonun doirasida faoliyat yuritishi shart”, — Qo‘ng‘irotboy Sharipov.

Vazir OTM xodimlaridan ta’lim tizimida shaffoflik va halol raqobat bo‘lishi, abituriyentlar OTMlarga pora bilan emas, o‘z bilimi asosida o‘qishga kirishi uchun qonunga rioya qilish va shaxsiy mas’uliyat ko‘rsatishni so‘radi.

Oliy ta’lim muassasalariga kirish imtihonlari 14–23-iyul kunlari bo‘lib o‘tadi, jami 671 ming abituriyent ro‘yxatdan o‘tgan, 687 nafari barcha imtihon va test sinovlaridan ozod qilingan, ular milliy yoki xalqaro sertifikatlari mavjudligi sababli eng yuqori ball to‘plagan holda saralash bosqichiga o‘tkazilgan, bir yil avval oliy ta’lim muassasalariga kirish paytida atigi 1 nafar abituriyent test sinovlaridan butunlay ozod qilingan.