Oliy Majlis TDT mamlakatlarining Favqulodda vaziyatlar va tabiiy ofatlarda yordam ko‘rsatish to‘g‘risidagi bitimini ma’qulladi
Hujjat tabiiy ofatlarning oldini olish, monitoring qilish va oqibatlarini bartaraf etish bo‘yicha birgalikda ishlash mexanizmlarini belgilaydi.
Oliy Majlis senatorlari Turkiy davlatlar tashkilotining Favqulodda vaziyatlar va tabiiy ofatlar chog‘ida fuqaro muhofazasi mexanizmini yaratish to‘g‘risidagi bitimni ratifikatsiya qilish haqidagi qonunni ma’qulladi.
Ma’lumotlarga ko‘ra, tegishli hujjatni tomonlar 2024 yil noyabr oyida Bishkekda bo‘lib o‘tgan davlat rahbarlari sammitida imzolagan. Ozarbayjon, Qozog‘iston, Qirg‘iziston, Turkiya va O‘zbekiston kelishuv ishtirokchilari bo‘ldi. U TDT mamlakatlari o‘rtasida favqulodda vaziyatlar, tabiiy ofatlar va boshqa kutilmagan vaziyatlar uchun hamkorlikni yo‘lga qo‘yishga yordam berishi, shuningdek, tajriba almashish, qidiruv-qutqaruv operatsiyalarini muvofiqlashtirish va qo‘shma harakat mexanizmlarini yo‘lga qo‘yishi rejalashtirilgan.
Xususan, hujjatda tabiiy ofatlarning oldini olish, monitoring qilish va oqibatlarini bartaraf etish bo‘yicha birgalikda ishlashning huquqiy va tashkiliy asoslari qayd etilgan. Bundan tashqari, kelishuv mamlakatlar nafaqat bir-biriga, balki TDT kuzatuvchi davlatlariga, shuningdek, falokatlardan jabr ko‘rgan boshqa mamlakatlarga ham yordam ko‘rsatishi mumkinligini nazarda tutadi.
Senatorlar kelishuv O‘zbekistonning fuqarolar muhofazasi sohasidagi xalqaro hamkorligini yangi bosqichga olib chiqishi, iqlim, tabiiy ofatlar va texnogen xavf-xatarlar bilan bog‘liq global tahdidlarga yanada samarali javob berish imkonini berishini ta’kidladilar.
Hujjat kuchga kirgunga qadar prezident tomonidan imzolanishi kerak.
Avvalroq Shavkat Mirziyoyev TDT mamlakatlariga abadiy do‘stlik to‘g‘risidagi shartnomani qabul qilishni taklif qilgani xabar qilingandi. Prezident hujjat Tashkilotning siyosiy darajasini yuksaltirishini aytdi.
Izohlar