“O‘zbekneftgaz” va Boeing ekologik toza aviayoqilg‘i yetkazib berishga kelishib oldi
Ushbu yoqilg‘i turi aviatsiyaning atrof-muhitga ta’sirini sezilarli darajada kamaytiradi.
O‘zbekiston va AQShning Boeing kompaniyasi ekologik toza aviatsiya yoqilg‘isi ishlab chiqarish sohasida qo‘shma loyihalarni amalga oshirishga kelishib oldi, deb xabar bermoqda “O‘zbekneftgaz” axborot xizmati.
“O‘zbekneftgaz” raisi Boeing kompaniyasining hududiy direktorlari bilan uchrashuv o‘tkazdi. Tomonlar Transport vazirligi va milliy aviakompaniya bilan hamkorlikni kengaytirish rejalarini taqdim etdilar. Karbonat angidrid chiqindilarini kamaytirish va barqaror aviatsiya yoqilg‘isi (SAF) texnologiyalarini rivojlantirish masalalariga alohida e’tibor qaratildi.
Boeing delegatsiyasi “O‘zbekneftgaz” korxonalari, jumladan, Jet A-1 yoqilg‘isi ishlab chiqariladigan Buxoro neftni qayta ishlash zavodiga tashrif buyurdi. Shuningdek, ular Buxoro neftni qayta ishlash zavodi va Uzbekistan GTL hamkorligidagi ishlanmalar — Jet A-1 SSF yarim sintetik yoqilg‘isi va GTL kerosini bilan tanishdi.
Bunday yoqilg‘i turlaridan foydalanish aviatsiyaning atrof-muhitga ta’sirini sezilarli darajada kamaytiradi. Boeing va “O‘zbekneftgaz” qayta ishlash texnologiyalarini takomillashtirish va toza yoqilg‘i ishlab chiqarish bo‘yicha yangi yondashuvlarni muhokama qildi. Muzokaralar yakunida tomonlar qo‘shma ishchi guruh tuzish va O‘zbekistonning ekologik yoqilg‘ilar sohasidagi yutuqlarini xalqaro tadbirlarda taqdim etishga kelishib oldi, — deyiladi xabarda.
Mavzuga doir: Shavkat Mirziyoyev bir so‘zli inson — Donald Tramp. Uzbekistan Airways Amerikaning Boeing korporatsiyasining 22 ta samolyotini sakkiz milliard dollarga sotib oladi.
Izohlar