9 Iyul 2024, 12:46 •Oʻzbekiston

Oʻzbekistonning oltin-valyuta zaxiralari kamaydi

Zaxiralar tarkibidagi oltinning fizik hajmi va qiymati oshgan. Xorijiy valyuta zaxiralari esa 9,23 mlrd dollardan 8,43 mlrd dollargacha qisqargan.

Markaziy bank Oʻzbekistonning xalqaro valyuta zaxiralariga oid maʼlumotlarni yangiladi. Unga koʻra, 1-iyul holatiga, Oʻzbekistonning rasmiy zaxiralari 36,3 mlrd dollarni tashkil qildi.

Iyun oyi davomida oltin zaxiralarining qiymati 26,81 mlrd dollardan 27,31 mlrd dollargacha oshgan. Oʻz navbatida oltinning fizik hajmi 11,4 mln troya unsiyadan 11,7 mln troya unsiyagacha koʻpaygan.

Shuningdek, xorijiy valyuta zaxiralari qiymati 9,23 mlrd dollardan 8,43 mlrd dollargacha qisqargan.

Hisobot davrida Oʻzbekistonning xalqaro zaxiralari umumiy hisobda qariyb 294 mln dollarga kamaygan. Bunga oʻtgan oyda oltin eksport qilinmagani sabab boʻlgan boʻlishi mumkin.