O‘zbekistonliklar firibgarlikning yangi sxemasidan ogohlantirildi
Jinoyatchilar taniqli brendlar nomidan internetda “foydali” aksiyalarni joylashtirmoqda.
Ijtimoiy tarmoqlarda taniqli brendlar nomidan 30 ming so‘mlik muzlatkich olish uchun so‘rovnomadan o‘tish kerak bo‘lgan aksiya haqida firibgar reklama paydo bo‘ldi. Bu haqda Raqobatni rivojlantirish va iste’molchilar huquqlarini himoya qilish qo‘mitasi xabar bermoqda.
Masalan, Korzinka nomidan muzlatgichni 27 ming so‘mga, Coca-Cola nomidan esa ichimliklar bilan mini-muzlatgichni 30 ming so‘mga sotib olish taklif qilindi. Texnikani olish uchun aksiya ishtirokchilariga havola orqali o‘tib, so‘rovnomani to‘ldirish taklif etiladi. Biroq, Qo‘mita ma’lumotlariga ko‘ra, kompaniyalar tomonidan bunday aksiyalar o‘tkazilmaydi va ushbu sxema fishing belgilariga ega bo‘lib, fuqarolarning shaxsiy ma’lumotlarini o‘g‘irlash va ularning pullariga kirishga qaratilgan.
Agentlik fuqarolarni e’tiborli bo‘lishga, aksiyalarning ishonchliligini faqat kompaniyalarning rasmiy veb-saytlarida tekshirishga, shubhali havolalarga o‘tmaslikka va tekshirilmagan manbalarda bank kartalari rekvizitlarini kiritmaslikka chaqiradi.
Eslatib o‘tamiz, yaqinda Toshkentda.apk faylini tarqatib, o‘zbekistonliklarning kartalaridan qariyb 3 mlrd so‘mni o‘g‘irlagan firibgarlar qo‘lga olingandi.
Izohlar