O‘zbekistonliklar eng quruq va iliq sentyabr oylaridan birini boshdan kechirdi
Ayrim hududlarda yog‘ingarchilik oylik me’yordan oshib ketdi.
Sinoptiklar O‘zbekistonda 2025-yil sentyabr oyi eng issiq va quruq kuz oylaridan biri bo‘lganini ma’lum qildi, deb xabar bermoqda O‘zgidromet matbuot xizmati.
Mutaxassislar o‘tgan sentyabr oyini harorat rejimi bo‘yicha ancha iliq, haroratning keskin o‘zgarishlarisiz o‘tgan deb ta’rifladilar. Qayd etilishicha, respublika hududining katta qismida havo harorati 29-34 daraja issiq, eng issiq kunlarda ba’zi joylarda 35-37 darajagacha, respublika janubida 38-40 darajagacha bo‘ldi.
Sentyabr oyining ikkinchi yarmida haroratning qisqa muddatli pasayishi kuzatildi. Kechasi va ertalab havo harorati 9-14 darajagacha pasaydi, kunduzi 23-26 darajadan, janubda 29-31 darajadan oshmadi. O‘rtacha oylik havo harorati me’yordan 1,2-2,3 darajaga yuqori, shimolda ba’zi joylarda me’yor atrofida bo‘ldi.
Qayd etilishicha, 2025 yilning sentyabr oyi janubiy va Farg‘ona vodiysi bo‘yicha meteorologik kuzatuvlar tarixidagi eng issiq sentyabr oylari uchligiga, markaziy hududlar bo‘yicha esa beshligiga kirgan. Bundan tashqari, mutaxassislar kuzning birinchi oyini o‘ta qurg‘oqchil deb ta’rifladi.
O‘zbekiston hududining katta qismida yomg‘ir yog‘magan yoki yomg‘ir izlari kuzatilgan. Faqat Qoraqalpog‘istonda sentyabr oyida yog‘gan yomg‘ir miqdori oylik me’yordan 2-3 barobar, ayrim hududlarda esa 4-7 barobar ko‘p bo‘ldi. Shuningdek, shimolda, janubda va cho‘l hududlarida, kamroq markaziy hududlarda ba’zi joylarda shamol tezligi 13-18 m/s gacha, Ustyurtda 22 m/s gacha kuchayishi kuzatildi.
Shunday qilib, 22-sentyabr kuni O‘zbekiston va janubiy Qozog‘istonning cho‘l hududlaridan changli tuman kirib keldi va sovuq fronti bilan birga Toshkentni qopladi. Natijada ko‘rish masofasi 4 km gacha qisqardi. Qayd etilishicha, Toshkent shahrida tuman va uning oqibatida havoning yuqori darajada ifloslanishi taxminan bir sutka davom etgan.
Avvalroq, oktyabr oyida o‘zbekistonliklar kuzgi sovuqlikni boshdan kechirishlari haqida xabar berilgan edi. Sinoptiklar ham yog‘ingarchilik kuchayishini bashorat qilmoqda.
Izohlar