O‘zbekistonlik eksportchilar mevalarning minimal narxlari joriy etilganidan shikoyat qildi

Meva eksportchilari qishloq xo‘jaligi mahsulotlarini eksport qilish uchun minimal narxlar joriy etilgandan keyin narxning pasayishi bozor qiymatini aks ettirmasligidan shikoyat qilishdi. O‘simliklar karantini va himoyasi agentligi holat yuzasidan izoh berdi.

Vazirlik ma’lumotlariga ko‘ra, minimal eksport narxlari eng yirik ulgurji bozorlardagi narxlarni, shuningdek, eksportchilarning o‘z takliflarini hisobga olgan holda shakllantiriladi. Jarayon SSP bilan birgalikda muvofiqlashtiriladi. Asosiy maqsad – eksport narxlarini sun’iy pasaytirishga yo‘l qo‘ymaslik, valyuta tushumini to‘liq ta’minlash, “yashirin iqtisodiyot”ga qarshi kurashish.

6-iyun kuni xo‘jaliklarda “Valovaya” va “Sweet Ariyana” navli gilosning o‘rtacha narxi 1 kg uchun 45 ming so‘mdan 55 ming so‘mgacha bo‘lgan. Ba’zi eksportchilar bir kg uchun bir dollardan past narxni e’lon qilishga harakat qilishadi. 2025-yil statistikasiga ko‘ra, xorijda o‘zbek gilosi quyidagi narxlarda sotilmoqda:

• Rossiyaga – 1 kilogramm uchun o‘rtacha 4 dollardan;
• Janubiy Koreyaga – bir kilogramm uchun 6-7 dollar;
• Xitoyga – 4,5-6 dollar;
• Fors ko‘rfazi mamlakatlariga – 13 dollargacha.

Buning fonida qog‘ozda qiymatni soxta pasaytirish soliqlar va valyuta tushumlarini kamaytirish usuli sifatida qabul qilinadi. Agentlikning ta’kidlashicha, minimal narxlar doimiy emas. Ular zarurat tug‘ilganda yangilanadi, eng qizg‘in mavsumda esa hatto har kuni o‘zgartirilishi mumkin.

Eksport qiluvchilar “Eksportchilar uyushmasi” Telegram guruhi yoki 71 202-77-78 telefon raqami orqali takliflar kiritishlari va muhokamalarda ishtirok etishlari mumkin.

Eslatib o‘tamiz, endilikda O‘zbekiston bozorlarida afg‘on gilosi sotila boshlaydi. Import qiluvchilar olma va uzum yetkazib berish variantlarini ham ko‘rib chiqmoqda.