O‘zbekistondagi yangi liftlarning 78 foizi texnik ko‘rikdan o‘tmagani ma’lum bo‘ldi

So‘nggi ikki yilda O‘zbekistonda 11,4 mingta yangi lift o‘rnatildi. Biroq, Texnik jihatdan tartibga solish agentligi vakili Raufjon Rasulovning ma’lum qilishicha, ularning 78 foizi (8,9 ming) haligacha majburiy texnik sinovlardan o‘tmagan.

Bundan tashqari, 6 mingdan ziyod (52 foiz) liftning texnik pasporti mavjud emas, 7,4 mingtasi (65 foiz) hech qanday ixtisoslashgan tashkilot tomonidan xizmat ko‘rsatilmaydi. Xavotirli statistika fonida mamlakatda xalqaro standartlarga javob beradigan yangi nazorat tizimi joriy etilmoqda. U liftning butun hayot siklini – loyihalashdan tortib utilizatsiyagacha qamrab oladi va Yevropa Ittifoqi, Turkiya, Xitoy va BAA tajribasiga asoslanadi.

Shu bilan birga, liftlarga texnik xizmat ko‘rsatishning hozirgi darajasi qoniqarsiz bo‘lib qolmoqda, bu esa fuqarolar xavfsizligi uchun xavf tug‘diradi. Yangi tizim ushbu muammolarni bartaraf etish va butun mamlakat miqyosida ko‘tarish mexanizmlariga ishonchli xizmat ko‘rsatishni ta’minlashga qaratilgan.

Avvalroq O‘zbekistonda liftlar yiliga kamida bir marta texnik ko‘rikdan o‘tkazilishi haqida xabar berilgandi. Tekshirilgan modellarga ularning holatini bildiruvchi rangli stikerlar yopishtiriladi. O‘rnatilgandan so‘ng foydalanishga topshiriladigan yangi lift va ko‘targichlar ham maxsus elektron tizimda ro‘yxatdan o‘tkazilgunga qadar majburiy birlamchi ko‘rikdan o‘tkaziladi.

Ixtisoslashtirilgan tashkilotlar pudratchi murojaat qilgan paytdan boshlab 10 ish kunidan kechiktirmay tekshiruv o‘tkazadi. Tekshiruvdan so‘ng mutaxassislar lift kabinasiga uning holatini ko‘rsatuvchi rangli stikerni yopishtiradi:

• yashil – lift soz va xavfsiz, undan foydalanish mumkin;
• ko‘k – e’tibor talab qiladigan kichik nosozliklar aniqlangan;
• sariq – lift nosoz, ta’mirtalab;
• qizil – foydalanish uchun xavfli, foydalanish taqiqlangan.

Bunda «qizil belgili» liftlar barcha qoidabuzarliklar bartaraf etilgunga qadar zudlik bilan foydalanishdan chiqarilishi kerak bo‘ladi. Yangi tizim fuqarolar xavfsizligini oshirish va liftlarning texnik holatini nazorat qilishning shaffofligini ta’minlashi rejalashtirilgan. Stikerlar esa aholiga liftning holatini darhol baholash imkonini beradi.