O‘zbekistonda rozilik olmay turib foto va video suratga olishni taqiqlash rejalashtirilmoqda

Deputatlar qonun hujjatlariga tasvirga olish va undan foydalanishda shaxs huquqlarini himoya qilishni kuchaytirishga qaratilgan o‘zgartish va qo‘shimchalar kiritish to‘g‘risidagi qonun loyihasini ko‘rib chiqmoqda.

Loyihaga ko‘ra, insonni suratga olish va uning tasviridan foydalanish faqat uning roziligi bilan mumkin bo‘ladi.

• Agar shaxs muomalaga layoqatsiz bo‘lsa — uning qonuniy vakili rozilik beradi.
• Vafot etgan taqdirda — agar tirikligida rozilik berilmagan bo‘lsa, uni berish huquqi merosxo‘rlarda bo‘ladi.

Bolalar himoyasiga alohida e’tibor qaratildi:

• 16 yoshgacha bo‘lganlarga ota-onalari yoki vasiylari rozilik beradi;
• 16 yoshdan boshlab bolalar mustaqil qaror qabul qila oladi.

Bundan tashqari, loyihada videokuzatuvda shaxsiy hayot daxlsizligini ta’minlash bo‘yicha qo‘shimcha chora-tadbirlar nazarda tutilgan. Binobarin, bino va inshootlarda kameralar o‘rnatilganda, albatta, ogohlantiruvchi belgilar qo‘yilishi kerak.

Hujjatda suratga olish va tasvirdan foydalanish roziliksiz amalga oshirilishi mumkin bo‘lgan holatlar ro‘yxati ham belgilangan.