O‘zbekistonda raqamli prokuror nazorati paydo bo‘ladi
Shuningdek, rasmiylar jinoyat ishi materiallarini yuritishning butun jarayonini raqamlashtirishni rejalashtirmoqda.
O‘zbekistonda fuqarolar huquqlari buzilishi holatlarining oldini olish maqsadida Bosh prokuratura tizimida raqamli prokuror nazoratini joriy etish rejalashtirilmoqda.
Ma’lumotlarga ko‘ra, rasmiylar Bosh prokuratura tizimida raqamli prokuror nazoratini joriy etish, shuningdek, tekshirish va monitoring jarayonlarini avtomatlashtirishni taklif qilgan. Bu qonun buzilishlarini tezkor aniqlash, mansabdor shaxslarning xatti-harakatlarini real vaqt rejimida kuzatish va nazorat faoliyatining shaffofligini ta’minlash imkonini berishi rejalashtirilgan.
Yig‘ilishda 2025-yil boshidan buyon davlat organlari tomonidan 7 mingdan ortiq noqonuniy hujjatlar qabul qilingani, nazorat organlarining faoliyati 12,5 ming nafar tadbirkorning huquqlari buzilishiga olib kelgani ta’kidlandi. Shu munosabat bilan, rasmiylar jinoyat ishlari materiallarini yuritishning butun jarayonini raqamlashtirmoqchi. Shu tariqa, jinoyat to‘g‘risidagi xabar kelib tushgan paytdan boshlab sud qarorini ijro etishgacha bo‘lgan barcha bosqichlar elektron tarzda qayd etiladi.
Bundan tashqari, tergov faoliyatiga sun’iy intellekt texnologiyalarini joriy etish rejalashtirilgan. Bu tergov harakatlarini tezlashtirish, inson omili ta’sirini kamaytirish va xodimlarning mas’uliyatini oshirish imkonini berishi kerak. Shu bilan birga, mamlakatimiz yetakchisi mutasaddilarga raqamli jinoyatlarning oldini olish va tergov qilishda huquqni muhofaza qiluvchi organlar salohiyatini oshirish uchun sun’iy intellekt, kiber va raqamli huquq sohalarida kadrlar tayyorlashni boshlash bo‘yicha topshiriq berdi.
Buning natijasida zamonaviy tahlil usullarini qo‘llay oladigan, raqamli xavf-xatar va tahdidlarni oldindan aniqlay oladigan va ularga samarali javob bera oladigan professional kadrlar sinfi shakllanishi kerak, — dedi davlat rahbari.
Avvalroq O‘zbekistonda tadbirkorlarni asossiz jarimaga tortgan amaldorlar jazolanishi haqida xabar berilgandi. Yil boshidan buyon sudlar tadbirkorlarning minglab shikoyatlarini qanoatlantirdi.
Izohlar