O‘zbekistonda oktyabr oyida qanday ob-havo kutilmoqda?

Unga ko‘ra, 5-oktyabrdan boshlab harorat pasayadi.

O‘zbekistonda 2024-yilning oktyabr oyi iliq ob-havo bilan boshlanadi, deb xabar bermoqda “O‘zgidromet”. 2—4-oktyabr kunlari harorat kechalari 13-18 daraja iliqqacha, kunduz kunlari 26-31 daraja iliqqacha ko‘tariladi.
Foto: “Daryo” / Madina Nurman

Respublika hududining katta qismida yog‘ingarchilik kutilmaydi. Yomg‘ir faqat 2-oktyabr kuni Toshkent viloyati va Farg‘ona vodiysi viloyatlarida va 3—4-oktyabr kunlari respublika shimolida va cho‘l hududlarida yog‘adi.

Respublika bo‘yicha 5-oktyabrdan 10-oktyabrgacha harorat foni pasayadi. Ushbu davrda havo harorati asosan kechalari 8-13 daraja iliq, kunduz kunlari 21-26 daraja iliq bo‘ladi.

O‘zbekistonning markaziy va sharqiy hududlarida 5—6-oktyabr kunlari baʼzi joylarda yomg‘ir yog‘adi. 7—10-oktyabrda asosan yog‘ingarchiliksiz ob-havo kuzatiladi.

Oyning ikkinchi va uchinchi o‘n kunliklarida harorat kechalari 10-15 daraja iliqdan 0-5 darajagacha iliq, kunduz kunlari 23-28 daraja iliqdan 15-20 darajagacha iliqqa o‘zgarib turishi kutilmoqda.

Oktyabr oyining uchinchi o‘n kunligida ayrim hududlarda ayoz kuzatilishi mumkin. Oktyabr oyi ikkinchi va uchinchi o‘n kunliklarining ayrim kunlarida (o‘n kunlikda 1-3 kundan) baʼzi joylarda yomg‘ir yog‘adi, tog‘larda qorga aylanadi.

Oylik yog‘ingarchilik miqdori meʼyordan kam, respublika shimolida, janubida va cho‘l hududlarida baʼzi joylarda meʼyor atrofida bo‘lishi kutilmoqda.

NOVA24 YouTubeʼda. Obuna boʻling
Asosiy yangiliklar va qiziqarli videolar