O‘zbekistonda cho‘l va tog‘ turizmini rivojlantirish uchun mablag‘ ajratiladi
Hokimiyat tadbirkorlarga ziplayn va osma yo‘llar xizmatlarini tashkil etish xarajatlarini qoplab beradi.
O‘zbekistonda ziplayn va arqon parki xizmatlarini tashkil etish xarajatlari qoplab beriladi, deb yozadi Norma.
Ma’lumotlarga ko‘ra, davlat mablag‘larning bir qismini tog‘li va cho‘l hududlaridagi tadbirkorlarga qaytarib beradi. Shuningdek, hukumat bunday ekstremal turizm tashkil etiladigan tuman va shaharlar ro‘yxatini tuzdi.
Qayd etilishicha, tog‘li va cho‘l hududlarida umumiy uzunligi kamida 200 metr bo‘lgan ziplayn ekstremal turizm majmuasini tashkil etish xarajatlarining bir qismini qoplash uchun 100 mln so‘m miqdorida, tog‘li va cho‘l hududlarida umumiy uzunligi kamida 150 kvadrat metr bo‘lgan taypark ekstremal turizm majmuasini tashkil etish xarajatlarining bir qismini qoplash uchun 80 mln so‘m miqdorida bir martalik subsidiya ajratiladi.
Subsidiya olish uchun tadbirkor Turizm qo‘mitasiga yozma yoki elektron ariza topshirishi kerak bo‘ladi, keyin komissiya uni 10 ish kuni ichida ko‘rib chiqadi. Pul mablag‘lari Turizmni qo‘llab-quvvatlash jamg‘armasi mablag‘lari hisobidan ajratiladi hamda ziplayn va taypark ekstremal turizm majmualari foydalanishga topshirilgandan keyingina taqdim etiladi.
Avvalroq Namanganda yana bir turizm qishlog‘i qurilishi haqida xabar berilgandi. Shaharchada 150 dan ortiq oilaviy mehmon uylari tashkil etilishi rejalashtirilgan.
Izohlar