O‘zbekiston va Gonkong o‘rtasida to‘g‘ridan-to‘g‘ri aviareyslar paydo bo‘lishi mumkin
Shuningdek, tomonlar xalqaro standartlar bo‘yicha kadrlar tayyorlaydigan xalqaro uchish akademiyasini ochish masalasini muhokama qildi.
O‘zbekiston va Gonkong o‘rtasida to‘g‘ridan-to‘g‘ri aviaqatnovlarni yo‘lga qo‘yish, muntazam yo‘lovchi va yuk tashish, shuningdek, uchuvchilar akademiyasini ochish masalalari muhokama qilindi, deb xabar beradi Transport vazirligi matbuot xizmati.
Ma’lumotlarga ko‘ra, bu imkoniyatni transport vaziri o‘rinbosari Jasurbek Choriyev va JDB Group Limited kompaniyasi raisi o‘rinbosari Chang Man Xin muhokama qilgan. Shuningdek, tomonlar O‘zbekiston, Gonkong va potensial xalqaro hamkorlar bilan istiqbolli takliflarni o‘rgandi.
Xususan, Gonkong va O‘zbekiston o‘rtasida to‘g‘ridan-to‘g‘ri aviaqatnovlarni yo‘lga qo‘yish, logistika, turizm va ishbilarmonlik aloqalarini rivojlantirishga hissa qo‘shadigan muntazam yo‘lovchi va yuk reyslarini yo‘lga qo‘yish imkoniyatlari muhokama qilindi. Ustuvor hamkor-operator roliga Hong Kong Airlines aviakompaniyasi taklif qilindi.
Bundan tashqari, ikki mamlakat vakillari O‘zbekistonda Xalqaro aviatsiya akademiyasini tashkil etish masalalarini muhokama qildi. Akademiyada uchuvchilar, texniklar, bortkuzatuvchilar, yerdagi xodimlar va aviatsiya menejerlarini xalqaro standartlar asosida tayyorlash rejalashtirilgan.
Avvalroq O‘zbekiston Iordaniya bilan aviaqatnovlarni yo‘lga qo‘yishi va Quvayt bilan parvozlar sonini oshirishi haqida xabar berilgandi. Shartnomalar Transport vazirligi vakillari tomonidan imzolandi.
Izohlar