O‘zbekiston tashqi internet kanallari sonini ko‘paytirmoqchi

O‘zbekistonda Xitoy hisobidan yangi tashqi internet kanalini ulash rejalashtirilmoqda, dedi Raqamli texnologiyalar vazirligi telekommunikatsiya infratuzilmasini rivojlantirish boshqarmasi boshlig‘i Murodjon Yo‘ldoshev “O‘zbekiston 24” telekanali efirida.

Ma’lumotlarga ko‘ra, ushbu liniya xalqaro telekommunikatsiya liniyalarini zaxiralashga va aholini sifatli, tezkor internet bilan ta’minlashga yordam berishi kerak. Mutaxassisning so‘zlariga ko‘ra, davlat rahbari Markaziy Osiyo va Xitoy o‘rtasidagi transport va energetika yo‘laklari bilan bir qatorda optik tolali aloqa liniyasi trassasini qurish muhimligini alohida ta’kidlagan.

Murodjon Yo‘ldoshevning ta’kidlashicha, ushbu tashabbus mamlakatni internetga ulash uchun qo‘shimcha liniya yaratishga yordam beradi. Shu tariqa O‘zbekiston o‘zini jahon axborot makoni bilan yana bir optik tolali aloqa liniyasi bilan ta’minlaydi. Shuningdek, mutaxassis mamlakatda “Aqlli shahar”, “Aqlli logistika” va “Xavfsiz shahar” tashabbuslari doirasida telekommunikatsiya transport tarmog‘ini kengaytirish bo‘yicha ikkita yirik loyihani amalga oshirish rejalashtirilayotganini ma’lum qildi.

“Prezident tashabbuslari ushbu loyihalarni ishga tushirish uchun poydevor bo‘ldi”, — dedi Raqamli texnologiyalar vazirligi vakili.

Avvalroq O‘zbekiston mobil internet tezligi reytingida pastga tushgani haqida xabar berilgandi. Shu bilan birga, mamlakat simli internet tezligi bo‘yicha o‘z o‘rnini yaxshilagan.