Oʻzbekiston Qozogʻistonga suv joʻnatishni oshirmoqchi

2023-yil oktyabrdan 2024-yilning shu davriga qadar Qozogʻistonga 15 milliard kub metr suv joʻnatilgandi.

Qozogʻiston suv xoʻjaligi va irrigatsiya vaziri Nurjan Nurjigitov hamda Oʻzbekiston suv xoʻjaligi vaziri Shavkat Hamrayev ikki tomonlama suv hamkorligini chuqurlashtirish boʻyicha qoʻshma ishchi guruhining 12-yigʻilishida ayrim oʻzgarishlarni kelishib oldi.

Tomonlar oʻtgan suv xoʻjaligi yilida (2023-yil oktyabr – 2024-yil oktyabr) Qozogʻistonga 15 milliard kub metr suv joʻnatilganini taʼkidladilar. Shunday qilib, joriy suv xoʻjaligi yilida bu hajmni 1 milliard kub metrga oshirish kutilmoqda.

Bundan tashqari, vazirlar Qozogʻistonning Turkiston va Oʻzbekistonning Jizzax viloyati fermerlari suv taʼminotini yaxshilash imkonini beruvchi davlatlararo kanallarda taʼmirlash ishlarini birgalikda olib borishiga kelishib olishgan.

“Fevral oyida qoʻshma ishchi guruhning xalqaro tashkilotlar vakillari ishtirokidagi yigʻilishi boʻlib oʻtadi, unda kelgusidagi harakatlar muhokama qilinadi”, – deydi Qozogʻiston suv xoʻjaligi va irrigatsiya vaziri.

NOVA24 Instagramʼda. Obuna boʻling
Asosiy yangiliklar va qiziqarli videolar