O‘zbekiston Global ijtimoiy adolat fondini tashkil etishni taklif qildi

Shavkat Mirziyoyev 4-noyabr kuni Doha shahrida o‘tkazilgan ijtimoiy rivojlanish bo‘yicha ikkinchi Butunjahon sammitida ishtirok etdi, deb xabar bermoqda prezident matbuot xizmati.

Davlat rahbari so‘zining avvalida forumga yuksak darajada tayyorgarlik ko‘rilgani uchun tashkilotchilarga minnatdorlik bildirib, global ijtimoiy taraqqiyot uchun muhim maydon bo‘lgan sammit aynan Doha shahrida o‘tkazilayotgani katta ramziy ma’noga ega ekanini ta’kidladi.

Prezident keyingi yillarda Qatar ijtimoiy inklyuzivlik va jadal taraqqiyotning global markaziga aylanib borayotganini ta’kidlab, ushbu mamlakat xalqini erishilgan muvaffaqiyatlar bilan samimiy tabrikladi.

Shuningdek, prezident hozirgi vaqtda jahon hamjamiyati va milliy hukumatlar ijtimoiy farovonlikni ta’minlash va aholi turmush darajasini oshirish uchun birgalikda sa’y-harakat qilayotganini ta’kidladi. O‘zbekiston, shuningdek, barqaror rivojlanishga erishishga qaratilgan hamkorlikning barcha xalqaro formatlari va tashabbuslarini qo‘llab-quvvatlaydi.

Yangi O‘zbekistonda “Inson qadri uchun” tamoyilini o‘zida mujassam etgan keng ko‘lamli ijtimoiy davlat qurilishi amalga oshirilayotgani, ijtimoiy adolat ta’minlanib, aholining ehtiyojmand qatlamlari samarali himoya qilinayotgani ta’kidlandi. Davlat rahbari mamlakatda kambag‘allik darajasini 35 foizdan 6,6 foizga qisqartirishga erishilganini aytdi.

Bundan tashqari, davlatimiz rahbari global ijtimoiy adolat va barqaror taraqqiyotni mustahkamlashga qaratilgan qator taklif va tashabbuslarni ilgari surdi. Davlat rahbari kambag‘allikka qarshi kurashishda xalqaro hamkorlikni yangi bosqichga olib chiqish muhimligini ta’kidlab, rivojlanayotgan mamlakatlarning ijtimoiy dasturlariga resurslarni jalb qiladigan kambag‘allikka qarshi kurashishning yangi moliyaviy arxitekturasini yaratish vaqti kelganini aytdi.

Buning uchun kambag‘allikni qisqartirish va ijtimoiy tengsizlikni kamaytirishga amaliy ko‘mak beradigan Global ijtimoiy adolat jamg‘armasini ta’sis etish taklif qilindi. Davlat rahbari bandlik masalalarini samarali hal etish uchun zamonaviy mexanizmlarni joriy etish muhimligini ta’kidladi.

Qayd etilganidek, yuqori texnologiyalar va sun’iy intellektning jadal rivojlanishi dunyo bo‘ylab millionlab ish o‘rinlarining qisqarishiga olib kelmoqda. Bunday sharoitda xodimlarni qo‘llab-quvvatlash va ijtimoiy sheriklik tamoyillarini mustahkamlash uchun davlat, biznes va jamiyatning faol hamkorligi alohida ahamiyat kasb etadi.

Prezident “Ijtimoiy mas’uliyat va munosib mehnat bo‘yicha global tashabbus”ni ishlab chiqish tashabbusi qo‘llab-quvvatlanishiga umid bildirdi. Shu bilan birga, barcha uchun ta’lim imkoniyatlarini kengaytirish ijtimoiy muammolarni hal qilishning eng samarali yo‘llaridan biri ekanligi ta’kidlandi.

Ekspertlarning hisob-kitoblariga ko‘ra, savodsizlikning yillik iqtisodiy zarari 1,4 trillion dollarni tashkil etadi, bu esa yoshlarning jamiyatda va mehnat bozorida o‘z o‘rnini topishini qiyinlashtiradi, shuningdek, ijtimoiy tengsizlikni kuchaytiradi. Davlat rahbari kuni kecha bo‘lib o‘tgan Ochlik va qashshoqlikka qarshi kurashish global alyansining birinchi yig‘ilishida qabul qilingan qarorlarni O‘zbekiston to‘liq qo‘llab-quvvatlashini ta’kidladi.

Davlat rahbari Alyansning bo‘lajak sammitlaridan birini O‘zbekistonda o‘tkazishni taklif etib, ta’lim masalalarini kun tartibining asosiy mavzusi etib belgiladi. Mehnat migrantlari va ularning oila a’zolarini tizimli himoya qilish zarurligiga alohida e’tibor qaratildi.

Kelgusi yili xalqaro mehnat va migratsiya tashkilotlari bilan birgalikda O‘zbekistonda Migrantlar va ularning oilalarini ijtimoiy va huquqiy himoya qilish bo‘yicha xalqaro forum o‘tkazish va Global dastur qabul qilishni taklif etaman, — dedi prezident.

Bundan tashqari, prezident iqlim o‘zgarishining ijtimoiy hayotga ta’siri tobora kuchayib borayotganini ta’kidladi. Ekstremal ob-havo hodisalari, cho‘llanish va bioxilma-xillikning yo‘qolishi, avvalo, aholining zaif qatlamlari – fermerlar, mavsumiy ishchilar, ekologik jihatdan noqulay hududlar aholisi hayotiga salbiy ta’sir ko‘rsatmoqda. Iqlim o‘zgarishiga qarshi kurashishni bandlik dasturlari bilan integratsiya qilish bo‘yicha kompleks chora-tadbirlar ko‘rish zarurligini ta’kidladi.

Davlat rahbari O‘zbekiston BMT tomonidan ekologik innovatsiyalar va texnologiyalar hududi deb e’lon qilingan Orolbo‘yi mintaqasini ijtimoiy-iqtisodiy rivojlantirishning yangi modelini yo‘lga qo‘yish niyatida ekanini, bu tajribani jahon hamjamiyati bilan baham ko‘rishga tayyorligini bildirdi. Mamlakat yetakchisi sammitda qabul qilingan qarorlar butun dunyodagi millionlab odamlarga ishonch va umid bag‘ishlashiga, barqarorlik va farovonlikni ta’minlashga katta hissa qo‘shishiga ishonch bildirdi.

Xalqaro taraqqiyot yo‘lida ijtimoiy kelishuvni yangilash, har bir inson uchun munosib hayot tarzini yaratish bizning asosiy burchimizdir, — dedi davlat rahbari.

So‘zining yakunida prezident sammitda qabul qilingan Doha siyosiy deklaratsiyasini to‘liq qo‘llab-quvvatlashini va uning barcha tamoyillarini amalda ta’minlashga tayyorligini ta’kidladi.