O‘zbekiston bo‘ylab maishiy korrupsiya tarqalmoqda

Senatorlar Korrupsiyaga qarshi kurashish agentligi faoliyatini tanqid qildi.

Senat majlisida ma’lum qilinishicha, mahallalarda maishiy korrupsiya avj olgan, amaldorlar infratuzilmaga ulanish, litsenziya olish, imtiyozli kreditlar berish, ishga qabul qilish va malaka oshirish paytida pul talab qila boshlagan.

Xabarlarga ko‘ra, korrupsiyaning eng yuqori darajasi sog‘liqni saqlash, bandlik va bank faoliyati sohalarida saqlanib qolmoqda. Senatorlar ta’kidlashicha, huquqni muhofaza qiluvchi organlar korrupsiyaga oid jinoyatlarni aniqlash va ularga chek qo‘yishga e’tibor qaratmoqda, biroq ularning oldini olish choralariga yetarlicha e’tibor berilmayapti. Davlat organlarida komplayens nazoratining samaradorligi pastligicha qolmoqda.

Byudjetdan eng ko‘p mablag‘ oladigan vazirliklarda korrupsiyaviy omillar tizimli ravishda tahlil qilinmayapti. Binolarni qurish va foydalanishga topshirishda yuzaga keladigan byurokratiya va qonunbuzarlik holatlari alohida e’tiborga olingan.

Senatorlar Korrupsiyaga qarshi kurashish agentligini xorijiy tajribani o‘rganmagani va sohada yangi yechimlar taklif etmagani uchun tanqid qildilar.

Ushbu sohadagi qonunchilik bazasini takomillashtirish, hududlarda korrupsiyaning oldini olish bo‘yicha ishlarni faollashtirish, aholining huquqiy madaniyatini yuksaltirish va davlat xizmatlarini ko‘rsatish ustidan nazoratni kuchaytirish zarurligi ta’kidlandi.

NOVA24 Instagramʼda. Obuna boʻling
Asosiy yangiliklar va qiziqarli videolar